मनीष कुलकर्णी, इंडिया दर्पण वृत्तसेवा
महान फलंदाज मास्टर ब्लास्टर सचिन तेंडुलकर आणि विराट कोहली हे दोन्ही दिग्गज भारतीय क्रिकेटमधील सर्वोत्कृष्ट फलंदाजांपैकी एक आहेत. सचिन तेंडुलकरला आपला आदर्श मानून विराट कोहली मोठा झाला आहे. क्रिकेटचा देव मानला जाणारा सचिन तेंडुलकर जेव्हा निवृत्त होत होता, तेव्हा विराट कोहली भारतीय क्रिकेट संघात होता. निवृत्त होताना सचिनने विराटला एक अनमोल भेट दिली होती. ही भेट म्हणजे एक पवित्र धागा आहे. जो विराटला त्याचे वडील प्रेम कोहली यांच्याकडून मिळाला होता. सचिन तेंडुलकरने याबाबत सांगितले की, तो त्यांच्यासाठी खूपच भावूक क्षण होता. विराटने दिलेली ती भेट सचिनच्या थेट हृदयाला स्पर्शून गेली होती.
अमेरिकी पत्रकार ग्राहम बेंसिंगर यांना मुलाखत देताना सचिनने ही आठवण सांगितली. आपली आंतरराष्ट्रीय कारकीर्द आणि अखेरच्या सामन्याबद्दल सचिन म्हणाला, की “ड्रेसिंग रूममध्ये मी एका कोपऱ्यात बसून आपले अश्रू पुसत होतो. तो माझ्यासाठी खूपच भावूक क्षण होता. त्यावेळी विराट माझ्याजवळ आला, आणि मला एक पवित्र लाल धागा दिला. हा धागा त्याच्या वडिलांनी त्याला दिला होता. मी काही वेळेपुरता तो माझ्याजवळ ठेवला आणि पुन्हा त्याला परत केला. त्याला सांगितले, की हा धागा अनमोल आहे, तो तुझ्याकडेच असला पाहिजे. ही मौल्यवान वस्तू शेवटच्या श्वासापर्यंत तुझ्याजवळच असली पाहिजे. तो भावूक क्षण माझ्या आठवणींच्या कप्प्यात नेहमीच राहील”.
सचिनने २४ वर्षांच्या आपल्या आंतरराष्ट्रीय कारकीर्दीत भारताकडून २०० कसोटी आणि ४६३ एकदिवसीय सामने खेळले आहेत. त्याने आपला अखेरचा कसोटी सामना १६ नोव्हेंबर २०१३ रोजी मुंबईतील वानखेडे स्टेडिअममध्ये खेळला होता. तो त्याच्या कारकीर्दीतील २०० वा कसोटी सामना होता. सचिन मैदानाबाहेर जात असताना संपूर्ण देश भावूक झाला होता. एकदिवसीय सामन्यांमध्ये सचिननंतर विराट कोहलीच्या नावावर सर्वाधिक शतकांचा विक्रम आहे.
बघा या मुलाखतीचा व्हिडिओ
