अवघ्या १७ मिनिटांमध्ये संपन्न झाला विवाह सोहळा; कसा काय?

लखनऊ (उत्तर प्रदेश) – सध्या कोरोना काळात विवाह सोहळ्यांवर कडक निर्बंध आले आहेत. केवळ दोन तासात २५ व्यक्तींच्या उपस्थितीत हा सोहळा पार पडावा, असे निर्देश सरकारच्यावतीने देण्यात आले आहेत. शाहजहानपूर येथे एक विवाह चक्क १७ मिनिटात एक विवाह सोहळा संपन्न झाला, कसा काय ते जाणून घेऊ या…

     उत्तर प्रदेशातील शाहजहांपूर जिल्ह्यातील कलान परिसरातील पाटणा येथील देवकाली शिव मंदिरात अक्षय्य तृतीयेच्या शुभ मुहूर्तावर हे लग्न झाले. अवघ्या १७ मिनिटांत वधू-वरांनी सात फेरे घेतले. यावेळी वराच्या डोक्यावर फेटा किंवा सेहरा नव्हता, तसेच वर घोड्यावर बसला नव्हता किंवा बॅन्ड बाजा देखील नव्हता. कोरोनाच्या पार्श्वभूमीवर घातलेल्या निर्बंधांमुळे असा विवाह सोहळा संपन्न झाला.

      भाजपाचे सरचिटणीस पुष्पिंदर दुबे आणि हरदोईचे प्रिती दुबे यांचे लग्न तपोभूमि पटना देवकाली शिव मंदिरात अगदी साध्या सोहळ्यात पार पडले. वधू-वरांनी अवघ्या १७ मिनिटांत एकमेकांना जीवन साथी बनवले. विवाह सोहळ्यास उपस्थित असलेल्या पाहुण्यांसह वधू-वरांनी तरुणांना हुंडाविरोधी जागरूकतेचा संदेश दिला.

पुष्पेंद्र म्हणाले की, समाजाने मुलीचे महत्त्व समजून घेतले पाहिजे. तर त्याची जीवनसाथी बनणारी प्रीती म्हणाली की हुंड्यामुळे अनेक कुटुंबे उद्ध्वस्त झाली असून हे समाप्त करण्यासाठी तरुणांना पुढे यावे लागेल.

दरम्यान, राजकीय पदाधिकाऱ्याचे लग्न इतक्या साध्या पद्धतीने झाल्याने समाजामध्ये त्याची सर्वत्र चर्चा आहे. तसेच, हा आदर्श इतरांनीही घेऊन कोरोनाचा संसर्ग रोखावा, असे आवाहन करण्यात येत आहे.