मुंबई (इंडिया दर्पण वृत्तसेवा) – राज्याच्या विधानसभा निवडणुका जाहीर झाल्यानंतर आजचा गुरुपुष्यामृत योग साधत अनेक दिग्गजांनी आपला उमेदवारी अर्ज दाखल केला. राज्यात भाजप, शिवसेना शिंदे गट व अजित पवार गटाने आपल्या काही उमेदवारांची यादी जाहीर केली. तर शिवसेना ठाकरे गटाने ६५ उमेदवारांची यादी जाहीर केली. त्याचप्रमाणे राष्ट्रवादी शरद पवार गटाने एबी फॅार्म बहुतांश उमेदवारांना दिले. त्यामुळे या पक्षांच्या उमेदवारांनी आजच अर्ज भरले.
दिग्गज उमेदवारांनी रॅली व जोरदार शक्तीप्रदर्शन करत हे अर्ज भरले. अर्ज भरणा-या दिग्गजांमध्ये नाशिकमधून मंत्री छगन भुजबळ, नरहरी झिरवाळ यासह अनेक नेते होते. तर राज्यातून मंत्री चंद्रकांत पाटील, धनजय मुंडे, गुलाबराव पाटील, अनिल पाटील, राष्ट्रवादीचे प्रदेशाध्यक्ष जयंत पाटील, जितेंद्र आव्हाड, हर्षवर्धन पाटील, आदित्य ठाकरे यांच्यासह अनेक नेत्यांनी अर्ज दाखल केले.
