इंडिया दर्पण ऑनलाईन डेस्क
विधानपरिषदेच्या पाच रिक्त जागांसाठी भाजप पाठोपाठ आता शिवसेना शिंदे गटाने आपल्या उमेदवाराचे नाव जाहीर केले आहे. काल भाजपने ३ जागेसाठी संजय केणेकर, दादाराव केचे व संदीप जोशी यांचे नाव जाहीर केले. त्यानंतर आज शिंदे गटाने शिवसेना धुळे – नंदुरबारचे संपर्क प्रमुख आणि माजी विधान परिषद सदस्य चंद्रकांत रघुवंशी यांचे नाव जाहीर केले. तर राष्ट्रवादी अजित पवार गटाकडून अजून नाव पुढे आले नाही. पण, उमेश पाटील व झिशान सिद्दीकी यांचे नाव चर्चेत आहे. त्यातून एकाला संधी मिळू शकते.
विधानसभेवर विधान परिषदेचे पाच सदस्य निवडून गेल्यामुळे या जागा रिक्त होत्या. त्यामुळे या जागेसाठी आता २७ मार्च रोजी मतदान होणार आहे. पाच जागेपैकी महायुतीत ३ जागा भाजपला तर प्रत्येक एक जागा शिवसेना शिंदे गट व राष्ट्रवादी अजित पवार गटाला देण्यात आली आहे. ही निवडणूक जवळपास बिनविरोध होणार आहे.
