नाशिक (इंडिया दर्पण वृत्तसेवा) – नाशिक मध्य विधानसभा मतदार संघात महाविकास आघाडीतर्फे ही जागा कोणाला सुटते यावर तिढा असतांना शिवसेना ठाकरे गटाचे इच्छुक उमेदवार माजी आमदार वसंत गीते यांनी प्रचाराला सुरुवात केली आहे. त्यांनी काल काठे गल्ली, माणेकशा नगर येथे मतदारांच्या भेटी घेऊन संवाद साधला. यावेळी त्यांच्याबरोबर ठाकरे गटाचे नेते बाळासाहेब पाठक, सचिन मराठे, विशाल पवार हे उपस्थितीत होते.
या प्रचार फेरीत त्यांनी व्यापारी सुनील संकलेचा यांच्याशी संवाद साधून त्यांचे प्रश्न जाणून घेतले. नाशिक मध्य मध्ये महाविकास आघाडीतर्फे काँग्रेसने या जागेसाठी आग्रह धरला आहे. गेल्या वेळी या मतदार संघातून डॅा. हेमतला पाटील या उमेदवार होत्या. त्यामुळे त्यांनी या जागेसाठी आग्रह धरला आहे. तर शिवसेना ठाकरे गटाने या जागेवर आग्रह धरला आहे.
या मतदार संघातून महायुतीतर्फे भाजपच्या विद्यमान आमदार देवयानी फरांदे यांना पुन्हा उमेदवारी मिळेल असे बोलले जात होते. पण, भाजपच्या पहिल्या यादीत त्यांचे नाव आले नाही. त्यामुळे त्यांनी थेट समर्थक नगरसेवकांसह मुंबईत उपमुख्यमंत्री देवेंद्र फडणवीस यांची भेट घेतली. या जागेवर महायुतीतही तिढा आहे. शिवसेना शिंदे गटाने ही जागा आपल्याला सुटावी यासाठी आग्रह धरला आहे. ही जागा शिंदे गटाला सुटली तर या जागेवर कोण उमेदवार असेल हे अद्याप निश्चित नाही.
