लस घेतलेलाच नवरा हवा! अनोख्या मागणीची पोस्ट प्रचंड व्हायरल

विशेष प्रतिनिधी, मुंबई

सोशल मिडियात कधी, काय व्हायरल होईल याचा काही नेम नाही. गेल्या काही महिन्यांपासून लसीवरून एक व्हॉट्सअॅप जोक चांगलाच व्हायरल होतोय. यात ‘लस घेतलेल्या वधूला कोविशिल्ड घेतलेला वर चालेल का?’ असा गंमतीदार प्रश्न विचारला आहे. पण आता एक जाहिरातच व्हायरल होतेय. त्यात चक्क लस घेतलेला नवरा हवा आणि तोही कोविशिल्ड घेतलेलाच हवा, अशी मागणी करण्यात आली आहे.

मॅट्रीमोनियल जाहिरातीचे कटिंग सोशल मिडीयावर शेअर करण्यात आले आहे. यात मुलीने कोविशिल्डचे दोन्ही डोस घेतलेल्या मुलाची अपेक्षा व्यक्त केली आहे. खासदार शशी थरुर यांनी देखील ही पोस्ट शेअर करून त्यावर कमेंट केली आहे, पण या पोस्ट मागचे सत्य वेगळेच आहे. 

केवळ शशी थरुर नव्हे तर हजारो नेटकऱ्यांनी ही पोस्ट शेअर केली आहे. या जाहिरातीत मुलीने आपली उंची, शिक्षण, रंग आदींबाबत माहिती देऊन लिहीले आहे की, तिने कोविशिल्डचे दोन्ही डोस घेतलेले आहेत. त्यामुळे त्याच मुलाने तिला लग्नाचे प्रपोजल पाठवावे, ज्याने कोविशिल्डचेच दोन डोस घेतलेले आहेत.

शशी थरुर काय म्हणाले…

काँग्रेस नेते शशी थरुर यांनी ही पोस्ट शेअर करताना म्हटले आहे की, ‘लस घेतलेल्या उपवधूने लस घेतलेल्या उपवराची मागणी केली आहे. यात काहीच शंका नाही की, असे लग्न एक बुस्टर शॉट असेल. पण हेच आपले न्यू नॉर्मल असेल काय?’ ही कमेंटही हजारो लोकांनी लाईक करून शेअर केलेली आहे.

सत्य काय आहे?

मुळात ही जाहिरातच बनावट आहे. कुठल्याच मुलीने अशा प्रकारची जाहिरात दिलेली नाही. एडिटिंग टुलचा वापर करून अश्या पद्धतीची जाहिरात तयार करण्यात आली आणि ती सोशल मिडीयावर व्हायरल करण्यात आली आहे. थरुर यांनी शेअर केलेल्या पोस्टवर एका तरुणाने ही जाहिरात फेक असल्याची कमेंटही केली आहे.