उत्तर प्रदेशात असे सुरू आहे धर्मांतर; ATSच्या तपासात उघड झाल्या या धक्कादायक बाबी

अलीगड (उत्तर प्रदेश) –  उत्तर प्रदेशात आमिष दाखवून असहाय्य लोकांचे धर्मांतर करणारी टोळी सक्रिय आहे. त्यांच्याद्वारे पैसे, नोकरी, लग्नाचे आमिष दाखवून हजारो लांकांचे धर्मांतर करण्यात आले आहे. धर्मांतर करणार्या टोळीतील दोघांना उत्तर प्रदेश पोलिसांच्या एटीएस पथकाने पकडल्यानंतर अनेक प्रकरणे उघड होऊ लागली आहेत.

येथील मेरिस रोड येथील एका अपार्टमेंटमध्ये राहणार्या बहीण-भावाने धर्मांतर केल्याची माहिती उघड झाली आहे. एटीएसच्या पथकांकडून याबाबत चौकशी सुरू आहे. धर्मांतरानंतर युवकाने कार्तिक नाव बदलून फैजुलरहमान असे नाव धारण केले. तर त्याची बहीण सृष्टी झैनब या नावाने ओळखू लागली आहे.

मेरिस रोड येथील हरिओमनगरमधील नॅयर अपार्टमेंटच्या चौथ्या मजल्यावर एक फ्लॅटमध्ये फैजाबाद येथील एक कुटुंब राहात होते. कुटुंबप्रमुख एका खासगी कंपनीत नोकरी करत होते. परंतु सात वर्षांपूर्वी त्यांचा सासनी येथे रस्ता अपघातात मृत्यू झाला होता. कुटुंबात त्यांची पत्नी, मुलगा आणि मुलगी हेच होते. घरातील आर्थिक परिस्थिती खूपच हलाकीची होती. मुलगा-मुलगी अलीगड मुस्लिम विद्यापीठात शिकत होते. यादरम्यान त्यांच्या घरी काही बाहेरील लोकांची ये-जा सुरू झाली. काही दिवसांनंतर दोन्ही भावा-बहिणीने धर्मांतर केले.

धर्मांतराचा मुद्दा गरम होताच आरोपी उमर गौतम याचे एएमयूमधील धागेदोरे समोर आले. त्यामुळे अलीगड एटीएसच्या नजरेत आले आहे. माहितीची पडताळणी केल्यानंतर आढळले की. दोघा भावा-बहिणीने धर्मांतर केले आहे. युवक कार्तिक तिवारीचे धर्मांतर २०१८ मध्ये झाले होते. तर सृष्टी तिवारी हिने २०१९ मध्ये धर्मांतर केले होते.

दोघांचे मुस्लिम धर्मात विवाह

धर्मांतरानंतर फैजुरसहमान आणि झैनब यांनी दोघांनी दुसर्या धर्मातील जोडीदाराशी विवाह केला. फैजुलरहमानच्या पत्नीचे नाव झकिया आणि झैनबच्या पतीचे नाव शहनवाज आहे. धर्मांतरानंतर कुटुंबाने राहण्याचे ठिकाण बदलले. कुटुंबातील सदस्या अलीगडमध्येच दुसर्या ठिकाणी राहात आहेत. झैनबसुद्धा आपल्या पतीसोबत कुटुंबीयासोबत राहात आहे.

अपार्टमेंटमधील लोक आश्चर्यचकित

मेरिस रोडवरील नॅयर अपार्टमेंटमध्ये राहणार्या लोकांना भावा-बहिणीने धर्मांतर केल्याचे वृत्त समजताच त्यांना विश्वासच बसला नाही. दोघांनी धर्मांतर कधी केले हे समजलेच नाही. कुटुंबीयांनी राहण्याचे ठिकाण बदलले असले तरी फ्लॅटची विक्री केलेली नाही. सात दिवसांपूर्वी नवे भाडेकरून आले आहेत. त्यादरम्यान आई आणि मुलीला शेजार्यांनी पाहिले होते, असे सांगण्यात आले.

धर्मांतर करणार्या टोळीचा पर्दाफाश

उत्तर प्रदेश पोलिसांच्या दहशतवादविरोधी पथकाने (एसटीए) मूकबधीर आणि गरीब लोकांचे धर्मांतर करणार्या एका टोळीचा सोमवारी पर्दाफाश केला होता. एटीएसने टोळीतील दिल्लीत राहणार्या मुफ्ती काझी जहांगीर आलम कासमी आणि मोहम्मद उमर गौतम यांना लखनऊ येथे जेरबंद केले होते. ही टोळी मूकबधीर आणि गरीब लोकांना पैशांचे, नोकरीचे व लग्नाचे आमिष दाखवून धर्मांतर करण्यासाठी तयार करत होती. आतापर्यंत या टोळीने जवळपास एक हजार लोकांचे धर्मांतर केले आहे. त्यांच्या ताब्यातून परदेशी पैशांशी संबंधित कागदपत्रे आढळली आहेत.