मुंबई – विदर्भ मराठवाडा आणि मध्य महाराष्ट्रात काल काही ठिकाणी सोसाट्याचा वारा आणि विजांच्या कडकडाटासह पावसानं हजेरी लावली. आज आणि उद्याही या भागात काही ठिकाणी असाच पाऊस अपेक्षित आहे. विदर्भात काही ठिकाणी तर मराठवाड्यात तुरळक ठिकाणी गारपिटीचा इशाराही देण्यात आला आहे. अवकाळी पावसाचा हा फेरा, विदर्भ मराठवाड्यात १५ तारखेपर्यंत राहील असा हवामान विभागाचा अंदाज आहे. या पावसामुळे उन्हाची काहिली काहीशी कमी झाली असून काल ब्रह्मपुरी आणि मालेगाव वगळता कुठेही ४० अंश सेल्सीअसपेक्षा जास्त तापमानाची नोंद झाली नाही. आज तापमानात आणखी थोडी घट अपेक्षित आहे.
