नवी दिल्ली (इंडिया दर्पण वृत्तसेवा) – दुचाकी असो की चारचाकी वाहन चालविताना नजर समोर असली पाहिजे अन्यथा अपघात होऊ शकतो, म्हणूनच म्हणतात की, ‘नजर हटी , दुर्घटना घटी ‘ त्यामुळेच डोळ्यात तेल घालून रहदारीच्या रस्त्यावर किंवा महामार्गांवर वाहने चालवावी लागतात. परंतु एखादी नेत्रहीन व्यक्ती किंवा दृष्टिदोष असलेली व्यक्ती जर गाडी वाहन चालवत असेल तर ? कसे शक्य आहे ! परंतु ही सत्य परिस्थिती आहे. कारण खुद्द केंद्रीय मंत्री नितिन गडकरी यांनी ही बाब स्पष्ट केली आहे.
केंद्रीय रस्ते, महामार्ग आणि वाहतूक मंत्री नितीन गडकरी यांनी आपल्या सहकारी खासदारांना वाहतूकीबाबत जनजागृती करण्याचे, आणि नागरिकांना शिक्षित करण्याचे आणि रस्त्यांवर सुरक्षितता राखण्यासाठी काही आवश्यक उपाययोजना करण्याचे आवाहन केले आहे. लोकसभेत रस्ते वाहतूक आणि महामार्ग मंत्रालयाच्या अंतर्गत अनुदानाची मागणी’ या विषयावरील चर्चेला उत्तर देताना गडकरी यांनी काही गुपिते उघड केली.
एका सहकारी मंत्र्याने त्यांना सांगितले होते की, त्यांच्या वाहनाच्या चालकाला फक्त एका डोळ्यानेच थोडे दिसत असे. बरेच दिवस हे असेच चालले होते. आणखी एक रहस्य उलगडून दाखवत गडकरी यांनी सांगितले की, एका मुख्यमंत्र्यांनी त्यांना सांगितले होते की, त्यांच्या वाहनाचालकाला अजिबात दिसत नाही. तो पूर्णपणे दृष्टीहीन आहे आणि तो आवाज ऐकून गाडी चालवतो.
विशेष म्हणजे गडकरी यांनी यावेळी खासदारांना त्यांच्या वाहनचालकांना रस्ता सुरक्षा सुनिश्चित करण्यासाठी आणि जीव वाचवण्यासाठी वेळोवेळी त्यांचे डोळे तपासण्यास सांगण्यास सांगितले. ‘ शॉर्टकट किंवा सोप्या मार्गाने’ कोणीही ड्रायव्हिंग लायसन्स घेत नाही ना? हे स्वत: आणि त्यांच्या कर्मचाऱ्यांनीही पाहावे, असेही ते म्हणाले.
दरम्यान, नितीन गडकरी म्हणाले की, स्वावलंबी, सुखी, समृद्ध आणि समृद्ध भारत हा मोदी सरकारचा संकल्प असून तो पूर्ण करण्यासाठी आम्ही कटिबद्ध आहोत. सन 2024 पर्यंत, भारतातील रस्ते पायाभूत सुविधा विकसित देशाच्या बरोबरीने असतील, ज्यामुळे विकास आणि आर्थिक वाढ होईल आणि पर्यटनाला चालना मिळेल. तंत्रज्ञान आणि हरित इंधनात झपाट्याने होत असलेल्या बदलांमुळे इलेक्ट्रिक वाहनांच्या (ईव्ही) किमती कमी होतील आणि पुढील दोन वर्षांत त्यांची किंमत पेट्रोल-डिझेलवर चालणाऱ्या वाहनांच्या बरोबरीने असेल.
