मुकुंद बाविस्कर, इंडिया दर्पण वृत्तसेवा
सुमारे दोन ते अडीच वर्षांपासून हाहाकार माजविणाऱ्या कोरोना विषाणूवर आता भारतानेही नियंत्रण मिळविले आहे. कोरोनाच्या महामारीने दोन वर्षे सर्वांचीच कठीण परीक्षा पाहिली आहे. आता मात्र, अत्यंत दिलासादायक चित्र निर्माण झाले आहे. त्याचीच दखल केंद्र सरकारनेही घेतली आहे. त्यामुळेच केंद्र सरकारने कोरोना निर्बंध हटविण्याची घोषणा केली आहे. मात्र, मास्क घालण्याची सक्ती तेवढी कायम ठेवली आहे.
केंद्र सरकारने कोरोना विषाणू संदर्भात जारी केलेले सर्व निर्बंध हटवले आहेत. बुधवारी मोठा निर्णय घेत केंद्राने सर्व निर्बंध हटवण्याची घोषणा केली आहे. देशात सातत्याने कमी होत असलेल्या कोरोना रुग्णांमुळे सर्व निर्बंध हटवण्यात आले आहेत. कोविड निर्बंध जवळजवळ दोन वर्षे लागू होते.
वरिष्ठ शासकीय अधिकाऱ्यांनी सांगितले की, दि. 31 मार्चपासून सर्व निर्बंध उठवले जातील. केंद्र सरकारने कोरोनाची प्रकरणे रोखण्यासाठी 24 मार्च 2020 रोजी आपत्ती व्यवस्थापन कायदा 2005 अंतर्गत अनेक मार्गदर्शक तत्त्वे जारी केली होती. तरीही आता केवळ फेस मास्क घालणे आवश्यक असेल.
केंद्रीय गृहसचिव अजय भल्ला यांनी राज्ये आणि केंद्रशासित प्रदेशांना पत्र लिहिले आहे. या पत्रात त्यांनी राज्ये आणि केंद्रशासित प्रदेशांना डीएम कायद्यांतर्गत जारी केलेली मार्गदर्शक तत्त्वे काढून टाकण्यास सांगितले आहे. याबाबत ते म्हणाले की, राष्ट्रीय आपत्ती व्यवस्थापन प्राधिकरणाने निर्णय घेतला आहे की यापुढे डीएम कायद्यातील तरतुदी लागू करण्याची आवश्यकता नाही.या नियमांची मुदत ३१ मार्च रोजी संपत आहे. यानंतर गृह मंत्रालयाकडून कोणताही आदेश जारी केला जाणार नाही.
विशेष म्हणजे, कोरोनाच्या प्रकरणांमध्ये सातत्याने घट होत आहे. सलग चौथ्या दिवशी कोरोनाचे दोन हजारांहून कमी रुग्ण आढळले आहेत. आरोग्य मंत्रालयाने सांगितले की, आज देशभरात कोरोनाचे 1,778 नवीन रुग्ण आढळले आहेत. गेल्या 24 तासांत 62 जणांचा मृत्यू झाला आहे. या दरम्यान 2,542 रुग्ण कोरोनापासून बरेही झाले आहेत. विशेष म्हणजे देशात आतापर्यंत 4,24,73,057 रुग्ण कोरोनापासून बरे झाले आहेत, तर एकूण 4,30,12,749 जणांना याची लागण झाली होती. याशिवाय कोरोनामुळे आतापर्यंत सुमारे 5 लाख16 हजार जणांचा मृत्यू झाला आहे.
