नवी दिल्ली (इंडिया दर्पण वृत्तसेवा) – कोरोनाच्या साथीमुळे अर्थव्यवस्थेला झालेला मोठा आघात पाहता सर्वसामान्यांना दिलासा देण्यासाठी अर्थसंकल्पामध्ये कररचनेत बदल केला जाण्याची मोठी आशा होती. मात्र, अर्थमंत्र्यांनी कराच्या रचनेत कुठलाही बदलन करण्याचे जाहिर केले आहे. त्यामुळे प्राप्तिकर दात्यांचा भ्रमनिरास झाला आहे. यंदा कर रचनेत सवलत मिळेल, अशी मोठी खात्री बाळगली जात होती. मात्र, केंद्रीय अर्थमंत्री निर्मला सीतारामन यांनी करदात्यांच्या तोंडाला पाने पुसली आहेत.
गेल्या वर्षीचीच कररचना
यंदाही गेल्या वर्षी प्रमाणेच आयकर भरावा लागणार आहे. त्यामुळे २.५ लाखापर्यंत कुठलाही कर लागणार नाही. २.५ लाख ते ५ लाख या उत्पन्नावर ५ टक्के कर असेल. ५ ते ७.५ लाख उत्पन्नावर १० टक्के कर, १० ते १२.५ लाख उत्पन्नावर २० टक्के कर, १२.५ ते १५ लाख उत्पन्नावर २५ टक्के कर आणि १५ लाखापेक्षा अधिक उत्पन्न असणाऱ्यांना ३० टक्के कर भरावा लागणार आहे.
दरम्यान, अर्थमंत्र्यांनी दोन दिलासा देणाऱ्या घोषणा केल्या आहेत. त्यातील एक म्हणजे दोन वर्षांपूर्वीच्या चुका सुधारण्याची संधी मिळणार आहे. तसेच, आयकर रिटर्न भरताना चूक झाल्यास अजून एक संधी मिळणार आहे.
