महाविकास आघाडी सरकारमधील घटक पक्ष असलेल्या काँग्रेसने स्वबळाचा नारा दिला आहे. त्यावर मुख्यमंत्री तथा शिवसेना पक्ष प्रमुख उद्धव ठाकरे यांनी प्रतिक्रीया दिली आहे. शिवसेनेचा आज स्थापना दिन आहे. त्यानिमित्त राज्यभरातील पक्ष पदाधिकारी आणि कार्यकर्ते यांच्याशी ठाकरे यांनी संवाद साधला. ठाकरे म्हणाले की, कोरोना काळात अनेक पक्ष स्वबळाची कास धरत आहेत. आपणही धरु. आपली ताकद आपण आजमावलीच पाहिजे. निवडणुका येतात आणि जातात मात्र, स्वबळ हे अभिमान आणि स्वाभिमानाचे असायला हवे. आपणही स्वबळाचा नारा देऊ. स्वबळावर लढणे हा आपला हक्क आहे, असा टोला मुख्यमंत्र्यांनी यावेळी लगावला.
ठाकरे पुढे म्हणाले की, माझ्या समोर शिवसैनिक नसताना अशा प्रकारचे भाषण करणे किंवा संवाद करणे अत्यंत अवघड आहे. राज्यभरात आपल्या सरकारचे काम खणखणीत वाजते आहे. आपले काम बोलते आहे. सहाजिकच अनेकांचे पोट दुखते आहे. मात्र, त्यांना औषध द्यायला मी काही डॉक्टर नाही. पण, राजकीय औषध नक्कीच देऊ शकतो. सत्ता न मिळाल्याने अनेक जण कासावीस झाल्याचेही ठाकरे यांनी रोखठोकपणे सांगितले.
निवडणुका लढविणे म्हणजे स्वबळ नाही किंवा स्वबळ हे केवळ निवडणुकीसाठी नाही. अन्यायाविरुद्ध आवाज उठविणे हे सुद्धा स्वबळच आहे. शिवसेनेच्या स्थापनेवेळी मराठी माणसाची प्रचंड गळचेपी होत होती. सातत्याने अपमान होत होता. त्याविरोधात शिवसेना प्रमुखांनी आवाज उठविला. ते स्वबळच होते, असेही ठाकरे यांनी यावेळी स्पष्ट केले.
Follow India Darpan
ताज्या बातम्या आणि चर्चांसाठी आमच्या सोशल मीडियावर जोडा!
ग्रामीण ते शहरी आणि जुन्या ते नव्या अशा सर्वच पातळीवर आम्ही विकास पत्रकारितेला अधिक महत्त्व देतो. समाजोन्नती व्हावी, लोकशाही बळकट व्हावी, अन्यायाला वाचा फोडावी आणि विधायक कार्य घडावे यासाठी आम्ही आग्रही आहोत.
