इंडिया दर्पण ऑनलाईन डेस्क
धाराशिवः देवाभाऊ-दाढीभाऊ-जाकेटभाऊ हे तिघे मिळून ‘महाराष्ट्र खाऊ’ करत असल्याचा आरोप शिवसेना पक्षप्रमुख उद्धव ठाकरे यांनी केला. त्याचसाठी महाविकास आघाडीच्या उमेदवारांना विजयी करण्याचे आवाहन त्यांनी केले. महायुतीला मत म्हणजे गुजरातला मत असल्याचे म्हणत पंतप्रधान नरेंद्र मोदी आणि केंद्रीय गृहमंत्री आणि अमित शाह यांच्यावरही निशाणा साधला. महाराष्ट्रातून निघताना मोदी आणि शाह यांच्यादेखील बॅगा तपासा, कारण ते महाराष्ट्र लुटून जात असल्याचे ठाकरे यांनी म्हटले आहे.
धाराशिव जिल्ह्यातील औसा येथे ठाकरे यांच्या सभेचे आयोजन करण्यात आले होते. या वेळी त्यांनी भारतीय जनता पक्षासह मोदी-शाह यांच्यावर टीका केली. शाह गृहमंत्रिपदाच्या खुर्चीवर बसण्यास योग्य नसल्याचे ठाकरे यांनी म्हटले आहे. मोदी यांच्या थापांमुळे महाराष्ट्र त्रस्त आहे. त्याच प्रमाणे माझी बॅग तपासण्यात अर्थ नाही; पण मोदी आणि शाह यांच्या बॅगा तपासल्या पाहिजेत. महाराष्ट्रातून निघताना मोदी आणि शाह यांच्या बॅगा तपासा, कारण ते महाराष्ट्र लुटून निघाले असल्याचे ठाकरे यांनी म्हटले आहे. आज मला सोलापूरला जायचे होते; मात्र हेलिकॉप्टरने येण्यापासून रोखले असल्याचे त्यांनी सांगितले.
मोदी पंतप्रधानपदासाठी योग्य नाहीत. त्यांनी १५ लाख देण्याचे सांगितले; मात्र १५०० रुपयेच देत असल्याचे ठाकरे यांनी म्हटले आहे. मंत्रालयात एक महत्वाची बैठक झाल्याची माहिती माझ्याकडे आली आहे. या बैठकीनंतर राज्यातील सोयाबीन आणि कापूस उत्पादक शेतकरी कसा सुखी झाला आहे, याची जाहिरात काही वर्तमानपत्रात येऊ शकते; मात्र राज्यातील सोयाबीन आणि कापूस उत्पादक शेतकरी हा राज्यातील आणि केंद्रातील सरकारवर चिडलेला आहे. मोठ्या प्रमाणात खरेदी झाली असल्याचा दावा ते करत असले, तरीदेखील शेतकऱ्यांकडे अजूनही त्यांचा माल पडून असल्याचे ठाकरे यांनी म्हटले आहे. काही दिवसात पेपरमध्ये तशा बातम्या देखील छापून येतील; मात्र या बातम्या छापून आल्यानंतर शेतकरीच बोलतील, अशा शब्दात मोदी यांच्यावर टीका केली.
ठाकरे यांच्या दोन दिवस बॅगा तपासणीच्या आणि त्यांचे विमान रोखण्याच्या टीकेवर निवडणूक आयोगाने स्पष्टीकरण दिले आहे. मोदी, शाह यांच्याही बॅगा तपासल्या जातात, असे निवडणूक आयोगाने म्हटले आहे.
