मुंबई (इंडिया दर्पण वृत्तसेवा) – भारतीय दूरसंचार नियामक प्राधिकरण म्हणजेच टीआरआयए (ट्राय) ने प्रीपेड मोबाईल ग्राहकांसाठी एक महत्त्वाचा निर्णय घेतला आहे. ट्रायने शुक्रवारी सर्व दूरसंचार कंपन्यांना मोबाइल रिचार्जची वैधता २८ दिवसांऐवजी ३० दिवस देण्याचे निर्देश दिले आहेत. या निर्देशानुसार दूरसंचार कंपन्यांना आता त्यांच्या प्लॅनमध्ये संपूर्ण महिन्याची वैधता असलेले एक विशेष व्हाउचर, कॉम्बो व्हाउचर ठेवावे लागणार आहे. ही नवीन योजना ६० दिवसांच्या आत सादर करावी लागणार आहे.
ट्रायने जिओ, एअरटेल आणि व्हीआयसारख्या दूरसंचार कंपन्यांना २८ दिवसांऐवजी ३० दिवसांचे नियोजन करण्याचे निर्देश दिले आहेत. TRAI नुसार, प्रीपेड ग्राहकांकडे ३० दिवसांसाठी किमान एक प्लॅन व्हाउचर, एक टॅरिफ व्हाउचर आणि एक कॉम्बो व्हाउचर असणे आवश्यक आहे. TRAI ने देशातील सर्व टेलिकॉम कंपन्यांना प्रीपेड ग्राहकांसाठी ३० दिवसांच्या वैधतेसह हा रिचार्ज प्लॅन ऑफर करण्यास सांगितले आहे. तसेच हा प्रीपेड प्लॅन ६० दिवसांच्या आत लागू करण्याच्या सूचनाही देण्यात आल्या आहेत.
टेलिकॉम कंपन्यांच्या सध्याच्या प्लॅन्सबाबत ट्रायकडे ग्राहकांकडून सातत्याने तक्रारी येत होत्या. सध्याच्या दूरसंचार कंपन्यांच्या दरात सातत्याने वाढ होत असली तरी वैधता कमी होत असल्याचा आरोप ग्राहकांनी केला आहे. अशा परिस्थितीत दरवर्षी त्यांना अतिरिक्त रिचार्ज करावे लागते, अशा तक्रारी ग्राहकांकडून करण्यात येत होत्या.
दुरसंचार कंपन्या मासिक प्लॅन सांगून २८ दिवसांचा प्लॅन दिला जातो. जेव्हा तुम्ही एका महिन्यासाठी रिचार्ज करण्यासाठी दुकानात किंवा ऑनलाइन जाल तेव्हा टेलिकॉम कंपन्या तुम्हाला मासिक प्लॅन सांगून २८ दिवसांची वैधता योजना देतात. तसेच, कंपन्या सतत त्यांचे प्लॅन महाग करत आहेत, परंतु ग्राहकांना तीच वैधता मिळत आहे, ज्यामुळे ग्राहकांना वर्षातून १३ वेळा मासिक रिचार्ज करावे लागते. ट्रायच्या या सूचनेनंतर ग्राहक एक महिन्याच्या अतिरिक्त रिचार्जचे पैसे वाचवू शकतील.
