मुंबई – टीव्हीवरील सर्वात लोकप्रिय मालिका म्हणून ‘तारक मेहता का उल्टा चष्मा’ कडे बघितले जाते. ही मालिका केवळ एक-दोन नव्हे तर तब्बल १४ वर्षांपासून प्रेक्षकांचे मनोरंजन करीत आहे. या मालिकेतील सर्वच पात्र प्रेक्षकांच्या प्रचंड आवडीचे आहेत. त्यामुळेच त्यांच्याबाबतीत घडणाऱ्या कुठल्याही प्रकारच्या घटनेविषयी प्रेक्षक अधिक सजग आणि आतूर असतात. या मालिकेत जेठालालची भूमिका अभिनेते दिलीप जोशी हे करीत आहेत. या मालिकेतील अथिशय लोकप्रिय पात्र दया भाभी हे अभिनेत्री दिशा वाकानी यांनी साकारले आहे. काही महिन्यांपूर्वीच दिशा यांनी ही मालिका सोडली आहे. या मालिकेत जेठालाल आणि दया भाभी हे पती-पत्नी आहेत. दया भाभीने मालिका सोडल्यानंतर आता जेठालालही मालिका सोडणार का असा प्रश्न उपस्थित केला जात आहे.
यासंदर्भात जेठालालची भूमिका करणाऱ्या अभिनेता दिलीप जोशी यांना एका मुलाखतीत हा प्रश्न विचारण्यात आला आहे. अतिशय लोकप्रिय ही मालिका आपण सोडणार का या प्रश्नावर जोशी म्हणाले की, या मालिकेला प्रेक्षकांची अभूतपूर्व अशी पसंती मिळाली आहे. या मालिकेत काम करताना मला प्रचंड आनंद मिळतो. ही मालिका सोडण्याचा प्रश्नच नाही., विनाकारण मी ही मालिका कशी सोडेन, असे स्पष्ट उत्तर जोशी यांनी दिले आहे. त्यामुळे त्यांच्या मालिका सोडण्याच्या अफवा आणि चर्चांना पूर्णविराम मिळाला आहे.
