‘द काश्मीर फाइल्स’चे दिग्दर्शक विवेक अग्निहोत्रींची सुरक्षा व्यवस्था वाढवली; आता असेल एवढा ताफा

नवी दिल्ली (इंडिया दर्पण वृत्तसेवा) – काश्मिरी पंडितांच्या विस्थापनाची व्यथा मांडणाऱ्या ‘द काश्मीर फाईल्स’ या चित्रपटाने पहिल्याच आठवड्यात जबरदस्त व्यवसाय केला आहे. रसिकांच्या पसंतीस उतरलेल्या या चित्रपटाचे खुद्द पंतप्रधान नरेंद्र मोदी यांनीदेखील कौतुक केले आहे. आता ‘द काश्मीर फाइल्स’ या प्रसिद्ध चित्रपटाचे दिग्दर्शक विवेक अग्निहोत्री यांना केंद्र सरकारने ‘वाय’ श्रेणीची सुरक्षा प्रदान केली आहे. विवेक अग्निहोत्री भारतभर जिथे जिथे जाईल तिथे सीआरपीएफचे जवान त्यांच्यासोबत असतील, सरकारच्या अधिकृत सूत्रांनी ही माहिती दिली.
सीआरपीएफचे आठ कमांडो ‘वाय’ श्रेणीच्या सुरक्षेत विवेक अग्निहोत्री येथे चोवीस तास तैनात असतील, असेही सूत्रांनी सांगितले. काश्मिरी पंडितांवर झालेले अत्याचार आणि त्यांचे विस्थापन यावर आधारित ‘द काश्मीर फाईल्स’ हा चित्रपट प्रेक्षकांच्या पसंतीस उतरला आहे. अनेक राज्यांमध्ये हा चित्रपट करमुक्त करण्यात आला आहे. त्याचबरोबर या चित्रपटावरून राजकारणही तापले आहे. एक वर्ग या चित्रपटाचे उत्स्फूर्तपणे कौतुक करत असून ते काश्मिरी पंडितांच्या समर्थनार्थ उभे असल्याचे बोलत आहे. तर दुसरा वर्ग हा चित्रपट भाजपचा राजकीय अजेंडा सांगत आहे. त्यामुळे अनेक राजकीय पक्षही या चित्रपटाला विरोध करत आहेत. यासोबतच चित्रपटाचे कलाकार अनुपम खेर आणि दिग्दर्शक विवेक अग्निहोत्री यांनाही टार्गेट करण्यात येत आहे. त्याचवेळी, दोन दिवसांपूर्वी पंतप्रधान नरेंद्र मोदी यांनी या चित्रपटाचे कौतुक करत विरोधकांवर जोरदार हल्ला चढवला होता.

मोदी म्हणाले की, नेहमी अभिव्यक्ती स्वातंत्र्याचा झेंडा घेऊन फिरतात, तो संपूर्ण समूह गेल्या ५-६ दिवसांपासून स्तब्ध आहे. तसेच चित्रपटातील वस्तुस्थिती, त्यातील कला इत्यादींवर चर्चा करण्याऐवजी, त्याला बदनाम करण्याची मोहीम सुरू केली जात आहे आणि संपूर्ण इको-सिस्टम या कामात गुंतली आहे.
काश्मिरी पंडितांच्या विस्थापनाच्या वेदना मांडणारा ‘द काश्मीर फाइल्स’ हा चित्रपट बॉक्स ऑफिसवर धुमाकूळ घालत आहे. पहिल्या आठवड्यात या चित्रपटाने जबरदस्त व्यवसाय केला आहे. या चित्रपटाने सात दिवसांत 100 कोटींची कमाई करून अनेक विक्रम मोडले आहेत. हा चित्रपट बहुतेक चित्रपटगृहांमध्ये हाऊसफुल्ल शोजसह सुरू आहे. दरम्यान, एखाद्या चित्रपट दिग्दर्शकाला अशाप्रकारे वाय श्रेणी सुरक्षा व्यवस्था पुरवण्याची देशातील अलीकडच्या काळातील ही पहिलीच घटना असल्याचे सांगण्यात येते.