होऊ द्या खर्च! कोरोना काळात ठाकरे सरकारचा प्रसिद्धीवर एवढे कोटी खर्च

विशेष प्रतिनिधी, नवी दिल्ली

शासकीय खात्यांमध्ये किती आणि कसा प्रचंड पैसा खर्च होईल ते सांगता येत नाही ? याच्या तपशीलवार आढावा किंवा माहिती घेतल्यास सर्वसामान्यांना आश्चर्य वाटेल इतका पैसा खर्च केला जातो. महाराष्ट्रात मुख्यमंत्री उद्धव ठाकरे यांच्या नेतृत्वातील राज्य सरकारने केवळ १६ महिन्यांत सुमारे १५५ कोटी रुपये प्रसिद्धीवर खर्च केले आहेत. म्हणजेच दरमहा ९.६ कोटी रुपये खर्च झाले असून या १५५ कोटी पैकी ५.९९ कोटी रुपये सोशल मीडियावर प्रसिद्धीसाठी देण्यात आले आहेत, अशी आरटीआयमध्ये  माहिती मिळाली आहे

माहितीच्या अधिकारात मिळालेल्या माहितीनुसार माहिती अधिकार कार्यकर्ते अनिल गलगली यांनी माहिती व जनसंपर्क महासंचालनालयाकडे महा विकास आघाडी सरकार स्थापनेपासून या मोहिमेवर झालेल्या विविध खर्चाची माहिती मागितली होती. दरम्यान महासंचालनालयाने दिलेल्या उत्तरानुसार सन २०१९ मध्ये २०.३१ कोटी रुपये खर्च करण्यात आला असून त्यापैकी जास्तीत जास्त १९.९२ कोटी रुपये नियमित लसीकरण मोहिमेच्या प्रचारात खर्च झाला.  त्याच वेळी सन २०२० मध्ये २६ विभागांच्या मोहिमेवर एकूण १०४.५५ कोटी रुपये खर्च करण्यात आले.

      सन २०२१ मध्ये १२ विभागांनी १२ मार्च पर्यंत २९.७९ कोटी रुपये खर्च केले आहेत.  जल जीवन मिशनच्या प्रचार मोहिमेवर १.८८ कोटी रुपये खर्च झाले आहेत. तर सोशल मीडियावर ४५ लाख रुपये खर्च झाले आहेत.  महिला व बालविकास विभागाने एकूण २.४५ कोटी रुपये खर्चून सोशल मीडियावर २० लाख रुपये खर्च केले आहेत.  अल्पसंख्याक विभागाने सोशल मीडियावर ५० लाख रुपयांपैकी ४८ लाख रुपये खर्च केले आहेत.  सार्वजनिक आरोग्य विभागाने ३.१५ कोटी रुपये खर्च केले आहेत.

गलगली म्हणतात की, सदर आकडेवारी अधिक असू शकते. कारण माहिती व जनसंपर्क महासंचालनालयाकडे १०० टक्के माहिती नसते. सोशल मीडियाच्या नावावर इतका प्रचंड खर्च करणे शंकास्पद आहे.  याशिवाय क्रिएटिव्हच्या नावावर दाखविलेल्या खर्चाची मोजणी अनेक शंकांना उपन्न करत आहे. तसेच मुख्यमंत्री उद्धव ठाकरे यांना लिहिलेल्या पत्रात अनिल गलगली यांनी विभागीय स्तरावरील खर्च, खर्चाचे स्वरुप आणि लाभार्थ्यांचे नाव संकेतस्थळावर अपलोड करण्याचे आवाहन केले आहे. तपशील व लाभार्थ्याचे नाव वेबसाइटवर अपलोड केले जावेत, अशी मागणी करण्यात आली आहे.