पाटणा (बिहार) – मंदिरात पूजा करण्यासाठी आलेल्या एका महिलेला चक्क तिचे केस धरून पुजाऱ्याने मारहाण केल्याची घटना दरभंगा जिल्ह्यात घडली आहे. या घटनेचा व्हिडिओ सोशल मीडियावर व्हायरल होताच मंदिर समितीने पुजाऱ्यावर कारवाई केली असून चौकशी करण्याचे आदेश दिले आहेत. तसेच सध्या पुजाऱ्याला मंदिराच्या पूजा कार्यातून काढून टाकण्यात आले आहे.
दरभंगाच्या माता श्यामा माई मंदिराच्या गाभाऱ्यात ही घटना घडली. येथे एका पुजारी बाबाने मंदिरात आलेल्या महिलेचे केस पकडून तिला मारहाण केली. कोणीतरी या घटनेचा व्हिडिओ बनवला. तो आता सोशल मीडियावर व्हायरल होत आहे. त्यामुळे तातडीने कारवाई करत मंदिर समितीने पुजाऱ्याला मंदिराच्या कामापासून बाजूला केले आहे.
दरम्यान, महिलेच्या बाजूने अद्याप कोणतीही तक्रार आलेली नाही. महिलेची ओळखही पटलेली नाही. तसेच दोन दिवसांपूर्वी ही घटना घडल्याचे सांगितले जात आहे.
सदर महिला श्यामा माईच्या पूजेसाठी मंदिरात जाण्यावर आग्रह करत होती, तर कोविड मार्गदर्शक तत्त्वांमुळे सामान्य लोकांसाठी मंदिराचे दरवाजे बंद होते. ती महिला मंदिराचे बंद दरवाजे उघडण्यावर ठाम होती. या प्रकरणावरून पुजारी आणि महिलेमध्ये वाद झाला. त्यावेळी भांडणा दरम्यान, संतप्त पुजारीने महिलेचे केस पकडून तिला मारहाण केली. व्हिडिओ बाबत दुजोरा देताना मंदिराचे व्यवस्थापक चौधरी हेमचंद्र रॉय म्हणाले की, महिलेसोबत असे वागणे योग्य नाही. परंतु पुजाऱ्याकडून स्पष्टीकरण मागवण्यात आले आहे. प्रकरणाची तपासणी सुरू आहे.
