इंडिया दर्पण ऑनलाईन डेस्क – अलाहाबाद उच्च न्यायालयाने ताजमहालच्या 22 खोल्या उघडून सर्वेक्षण करण्याची याचिका फेटाळून लावली आहे. ताजमहालच्या खोल्या उघडणारे तुम्ही कोण आहात, जनहित याचिकांची खिल्ली उडवू नका, अशी खरमरीत टिप्पणी हायकोर्टाने केली. त्यांनी अद्याप हार मानली नसल्याचे याचिकाकर्त्याच्या वकिलांचे म्हणणे आहे. या प्रकरणी ते सर्वोच्च न्यायालयात जाणार आहेत.
ताजमहालच्या 22 बंद खोल्या उघडण्यासाठी आणि सर्वेक्षण करण्याची याचिका अलाहाबाद उच्च न्यायालयाच्या लखनौ खंडपीठाने पूर्णपणे फेटाळली. सुनावणीदरम्यान न्यायालयाने याचिकाकर्त्याला फटकारले आणि ताजमहालच्या खोल्या उघडणारे तुम्ही कोण? जनहित याचिकांच्या व्यवस्थेचा गैरवापर होऊ नये, असे न्यायालयाने म्हटले आहे. तसेच उद्या तुम्ही येऊन म्हणाल की आम्हाला माननीय न्यायाधीशांच्या चेंबरमध्ये जाण्यासाठी परवानगी हवी आहे.
याचिकाकर्त्याच्या याचिकेवर उच्च न्यायालयाने म्हटले की, ताजमहाल शहाजहानने बांधला यावर तुमचा विश्वास नाही. तसे असेल तर जा आणि संशोधन करा, एमए करा, पीएचडी करा. ताजमहाल कोणी बांधला किंवा ताजमहालचे वय किती आहे हे ठरवायला आपण इथे बसलेले नाही आहोत, असेही न्यायालयाने बजावले आहे.
हायकोर्टाने याचिका फेटाळल्यानंतर याचिकाकर्त्याच्या वकिलाने कोर्टरूमबाहेर मीडियाला सांगितले की, मी आता सर्वोच्च न्यायालयात जाणार आहे. ताजमहालच्या त्या 22 खोल्या अनेक वर्षांपासून बंद असल्याचा पुनरुच्चार वकिलाने पुन्हा केला. त्या खोल्यांमध्ये काय आहे हे जाणून घेण्याचा प्रत्येकाला अधिकार आहे का?
