इंडिया दर्पण ऑनलाईन डेस्क – टी२० विश्वचषक २०२२ सुपर १२ मधील शेवटच्या सामन्यात न्यूझीलंडने आयर्लंडचा ३५ धावांनी पराभव केला. या विजयासह केन विल्यमसनच्या नेतृत्वाखालील न्यूझीलंड संघाने २०२२ च्या टी२० विश्वचषकाच्या उपांत्य फेरीत प्रवेश केला आहे. आयर्लंडच्या पराभवासह, किवी संघाचे आता ५ सामन्यांतून ७ गुण झाले आहेत आणि न्यूझीलंड हा सुपर १२ मधील पहिला संघ आहे, ज्याने २०२२2 च्या टी२० विश्वचषक स्पर्धेच्या सुपर-४ मध्ये स्थान मिळवले आहे. संघ अद्याप अधिकृतपणे पात्र ठरला नसला तरी, इंग्लंड आणि ऑस्ट्रेलियाचा प्रत्येकी एक सामना असल्याने आणि या संघांनी आपापले सामने जिंकल्यास निव्वळ धावगती पाहिली जाईल. न्यूझीलंडच्या संघाचा निव्वळ धावगती +२.११३ असेल, जी ऑस्ट्रेलिया (-०.३०४ ) आणि इंग्लंड (+०.५४७) पेक्षा खूपच चांगली आहे. त्यामुळे उपांत्य फेरी गाठणारा न्यूझीलंड हा पहिला संघ ठरला आहे.
आयर्लंडविरुद्ध प्रथम फलंदाजी करताना न्यूझीलंडने २० षटकांत ६ गडी गमावून १८५ धावा केल्या. प्रत्युत्तरात चांगली सुरुवात करूनही आयर्लंडला २० षटकांत ९ गडी गमावून १५० धावाच करता आल्या. १८६ धावांच्या लक्ष्याचा पाठलाग करताना आयर्लंडच्या संघाने दमदार सुरुवात केली आहे. पॉवरप्लेमध्ये संघाने ६ षटकांत एकही विकेट न गमावता ३९ धावा केल्या. दरम्यान, २५ चेंडूत ३० धावा केल्यानंतर बालबर्नी क्लीन बोल्ड झाला आहे. मिचेल सँटनरने त्याला बाद केले. पहिला विकेट पडल्यानंतरही आयर्लंडच्या विकेट्स पडत राहिल्या. आयर्लंडकडून पॉल स्टर्लिंगने ३७ धावा केल्या. कर्णधार बलबर्नी ३० धावा करून बाद झाला. जॉर्ज डॉकरेलने २३ धावा केल्या. न्यूझीलंडकडून लॉकीने ३, साऊथी, सँटनर, सोधीने २-२ बळी घेतले.
तत्पूर्वी, फॉर्ममध्ये परतलेल्या केन विल्यमसनने ३५ चेंडूत ६१ धावा केल्या, परंतु आयर्लंडचा वेगवान गोलंदाज जोशुआ लिटलने शुक्रवारी टी-20 विश्वचषकाच्या सामन्यात न्यूझीलंडला ६ बाद १८५ धावांवर रोखून संस्मरणीय हॅट्ट्रिक साधली. विल्यमसनने स्पर्धेत प्रथमच शंभरच्या स्ट्राईक रेटने फलंदाजी केली. त्याने आपल्या खेळीत पाच चौकार आणि तीन षटकार मारले.
सलामीवीर फिन ऍलनने १८ चेंडूत ३२, ग्लेन फिलिप्सने नऊ चेंडूत १७ आणि डॅरिल मिशेलने २१ चेंडूत नाबाद ३१ धावा केल्या. डावखुरा वेगवान गोलंदाज लिटिलने डेथ ओव्हर्समध्ये न्यूझीलंडचा रनरेट रोखला. १९व्या षटकात त्याने सलग तीन चेंडूंवर विल्यमसन, जिमी नीशम आणि मिचेल सँटनरचे बळी घेतले. मोठा फटका खेळण्याच्या प्रयत्नात विल्यमसनला झेलबाद झाला तर नीशम आणि सॅंटनर लेग बिफोर बाद झाले. संयुक्त अरब अमिरातीच्या कार्तिक मयप्पननंतरची ही विश्वचषकातील दुसरी हॅट्ट्रिक ठरली. कार्तिकने श्रीलंकेविरुद्ध हा पराक्रम केला.
न्यूझीलंडच्या डावातील सर्वात मोठे आकर्षण म्हणजे विल्यमसनचे फॉर्ममध्ये परतणे. सुरुवातीला संघर्ष केल्यानंतर तो मुक्तपणे खेळला. त्याने वेगवान गोलंदाज बॅरी मॅकार्थीला डीप मिडविकेटवर षटकार ठोकत आपले अर्धशतक पूर्ण केले. दोन चेंडूंनंतर त्याने त्याच जागी आणखी एक षटकार मारला. पुन्हा असाच फटका खेळण्याच्या प्रयत्नात १९व्या षटकात तो झेलबाद झाला. न्यूझीलंड एकेकाळी २०० धावांचा टप्पा ओलांडू पाहत होता पण शेवटच्या दोन षटकात आयर्लंडने केवळ १२ धावा दिल्या.
T20 World Cup Semi Final First Team
New Zealand
