मुंबई (इंडिया दर्पण वृत्तसेवा) – बडतर्फ पोलिस अधिकारी आणि संशयित आरोपी सचिन वाझे हे कारागृहात कैद असताना आपण आजारी असल्याने रुग्णालयात दाखल करण्यात यावे असे वारंवार सांगत आहेत, तसेच कर्मचाऱ्यांशी ते कोणत्याही प्रकारे सहकार्य करत नाहीत, या उलट त्यांच्याशी उद्धटपणे वागणूक करत असल्याने तुरुंग प्रशासन त्रस्त झाले आहे. आता तर त्यांनी कारागृहातील सुरक्षा रक्षकांसोबत असभ्य वर्तन करत धमकीही दिली, असा आरोप करीत तळोजा तुरुंग प्रशासनाने वाझेविरोधात मुंबईतील सत्र न्यायालयात तक्रार दाखल केली आहे. या तक्रारीमुळे वाझे यांना न्यायालयाच्या चौकशीला सामोरे जावे लागणार आहे. तुरुंग प्रशासनाच्या तक्रारीमुळे आपल्या अडचणींमध्ये मोठी वाढ होऊ शकते, यापुर्वी एका प्रकरणात वाझेने सत्र न्यायालयात माफी मागितली आहे.
केंद्रीय अन्वेषण ब्युरो (सीबीआय)ने भ्रष्टाचार प्रकरणात सहाय्यक पोलिस निरीक्षक अधिकारी सचिन वाझे, गृहमंत्री अनिल देशमुख आणि इतर दोघांना अटक केली होती. आपण देशमुख यांच्या आदेशानुसारच मुंबईतील बार आणि रेस्टॉरंटकडून पैसे गोळा केल्याचे सचिन वाझेने तपासा दरम्यान सांगितले होते. त्यानंतर अँटिलिया स्फोटक प्रकरणात अटकेनंतर निलंबित असलेले वाझे यांना लवकरच मुंबई पोलिस दलातून बडतर्फ केले होते. सध्या वाजे हे तळोजा कारागृहात आहेत. चौकशी करण्याची परवानगी विशेष पीएमएलए न्यायालयाने ईडीला दिली होती. मात्र त्यानंतरही वाझे यांची चौकशी झालेली नाही.
अँटीलिया बॉम्बस्फोट आणि मनसुख हिरेन हत्या प्रकरणात सचिन वाझे यांच्यावर गंभीर आरोप आहेत. तर माजी गृहमंत्री अनिल देखमुख यांच्यावर आरोप करण्यात आलेल्या शंभर कोटी वसुली प्रकरणामध्ये वाझे माफीचे साक्षीदार बनले होते. याच प्रकरणी वाझे यांच्या जीवाला धोका असल्याची माहिती तुरूंग प्रशासनाने न्यायालयाला दिली होती. पण आता वाजे यांच्या त्रासाने तुरुंग प्रशासन कंटाळले आहे
कारण वाझे हा सुरुवातीपासूनच जेलमधील त्याच्या वागण्यावरून चर्चेचा विषय राहिला आहे. त्याने नुकतेच सत्र न्यायालयात आपल्या डोळ्यांच्या त्रासाबद्दल म्हणणे मांडले आहे.
दोन्ही डोळ्यांमध्ये ग्लुकोमा झाला असल्याने मला रुग्णालयात दाखल होण्यासाठी परवानगी द्या, अशी विनंती त्याने सत्र न्यायालयाला केली आहे. त्याच्या या विनंतीची दखल घेत तुरुंग प्रशासनाला अहवाल सादर करण्यास सांगितले आहे. याच दरम्यान वाझेने रुग्णालयात नेण्यासाठी तुरुंगातील सुरक्षा रक्षकांबरोबर मोठा वाद घातल्याचे उघडकीस आले आहे. त्याने सुरक्षारक्षकांना असभ्य भाषेत धमकावल्याचेही तुरुंग प्रशासनाने तक्रारीत म्हटले आहे.
वाझे यांना सुरक्षा रक्षकाने अडवताच त्याने जोरजोरात ओरडत धमकी दिली. याबाबत तळोजा तुरुंग प्रशासनाने सत्र न्यायालयातील एनआयच्या विशेष कोर्टात तक्रार दाखल केली आहे. सत्र न्यायाधीशांनी तुरुंग प्रशासनाच्या तक्रारीची दखल घेत सचिन वाझेच्या वकिलांना उत्तर सादर करण्याचे निर्देश दिले आहेत. याप्रकरणी आता दि. १० नोव्हेंबरला सुनावणी होणार आहे.
Suspended Police Officer Sachin Waze Bad Behavior in Jail
