नाशिक (इंडिया दर्पण वृत्तसेवा)– भाजप नाशिक महानगर अध्यक्षपदी निवड झाल्यानंतर सुनील केदार यांनी भेटीगाठी सुरु केल्या आहे. या भेटीत ते जुने कार्यकर्ते यांच्याही भेटी घेत आहे. या भेटीत त्यांनी एका जेष्ठ नेत्याची भेट घेतल्यानंतर कुठे ते आजन्म एकनिष्ठ काम करणारे कार्यकर्ते व कुठे आजचे काही दलबदलू कार्यकर्ते असे सांगत आताच्या राजकारणातील पक्षबदणा-यांवर निशाणा साधला आहे. त्यांचा नेमका रोख कुणावर होता. हे स्पष्ट नसले तरी पक्ष बदलणा-यांवर त्यांनी सोशल मीडियाच्या पोस्टमधून खरमरीत टीका केली आहे.
त्यांनी फेसबुक पोस्टमध्ये म्हटले आहे की, संगमनेर तालुक्यातील सोनोशी गावाचे भाजपचे ज्येष्ठ नेते, माजी जिल्हा परिषद सदस्य व नियोजन मंडळ सदस्य सुदामराव सानप यांची त्यांच्या शेतावर भेट घेतली. लोकनेते गोपीनाथराव मुंडे यांचे खंदे समर्थक असलेले सुदामराव सानप यांनी त्यांच्या कार्यकाळात पक्ष संघटनेतील एकनिष्ठ, प्रामाणिकपणे केलेल्या कामकाजाला उजाळा दिला. डोळ्यांनी व्यवस्थित दिसत नसतांना, तब्बेत साथ देत नसतांना त्यांनी या विधानसभा निवडणुकीत भाजपा महायुतीचे अमोल खताळ पाटील या उमेदवाराच्या प्रचारार्थ २४ सभा घेतल्या व ४० वर्ष सतत निवडून येणाऱ्या काँग्रेसच्या बाळासाहेब थोरात यांचा पराभव केला.
त्यांना पक्ष संघटना वाढीसाठी लोकनेते गोपीनाथराव मुंडे यांनी उपमुख्यमंत्री असतांना १९९६ साली महिंद्रा कमांडर जीप दिली होती.ती जीप आजही त्यांच्या दारासमोर दिमाखात ऊभी आहे. कुठे ते आजन्म एकनिष्ठ काम करणारे कार्यकर्ते व कुठे आजचे काही दलबदलू कार्यकर्ते.
