या राज्यात शाळा-कॉलेज सुरू तर या राज्यात लॉकडाऊन वाढविला

विशेष प्रतिनिधी, नवी दिल्ली

कोरोना रुग्णांच्या संख्येत घट होत असताना काही राज्यांनी लॉकडाउन पूर्णपणे हटविला आहे तर काहींनी शिथिल केला आहे. तेलंगणामध्ये लॉकडाउन हटवून लोकांना दिलास दिला आहे. तर उत्तर प्रदेश, बिहार, दिल्लीसह अनेक राज्यात कठोर निर्बंध हळूहळू शिथिल करण्यात येत आहे. परंतु लॉकडाउन शिथिल करणे महागात पडू शकते अशी शक्यता गृहित धरून केंद्र सरकारने सर्व राज्यांना सतर्कतेच्या सूचना केल्या आहेत. सर्व राज्य सरकारांनी ३T+V  फॉर्म्युला स्वीकारण्याचे निर्देश दिले आहेत. त्याअंतर्गत टेस्ट-ट्रॅक-ट्रीट आणि व्हॅक्सीनेशनवर विशेष लक्ष देण्याच्या सूचनेचा समावेश आहे. तज्ज्ञांच्या एका गटाने देशात ऑक्टोबरपर्यंत कोरोनाची तिसरी लाट येण्याची शक्यता वर्तविली आहे. त्या पृष्ठभूमीवर सरकारने सर्व राज्यांना केंद्राने सूचना केल्या आहेत.

तेलंगाणा- शाळा, महाविद्यालये खुले

तेलंगणामध्ये शनिवारी लॉकडाउन हटविण्याचा निर्णय राज्य सरकारने घेतला आहे. राज्यातील शैक्षणिक संस्था पुन्हा सुरू होणार असल्याची घोषणा मुख्यमंत्री के.चंद्रशेखर राव यांनी केली आहे. विद्यार्थ्यांची अनिवार्य उपस्थिती, ऑनलाइन शिक्षणाच्या इतर बाबतीत दिशानिर्देश बनविण्याचे आदेश तेलंगणाच्या मंत्रिमंडळाने शिक्षण विभागाला दिले आहेत. हैदराबाद मेट्रोसेवा २१ जूनपासून सुरू होणार आहे.

कर्नाटक – लॉकडाउन वाढविला

कर्नाटकमध्ये ५ जुलैपर्यंत लॉकडाउन वाढविण्याचा निर्णय घेतला आहे. कोविड प्रतिंबधाच्या संबंधित कर्नाटक सरकारने संशोधित दिशानिर्देश जारी केले आहेत. ५ जुलैपर्यंत ते कायम राहणार आहेत. कर्नाटक सरकारने अंशिक लॉकडाउन लागू केला आहे. सर्व दुकाने, हॉटेल, क्लब, रेस्टॉरंट सायंकाळी ५ वाजेपर्यंत सुरू ठेवण्याची परवानगी दिली आहे. तसेच जिम, खासगी कार्यालये, रिसॉर्टमध्ये १६ जिल्ह्यांत ५० टक्के क्षमतेने सुरू ठेवण्याची परवानगी दिली आहे.

गोवा – २८ जूनपर्यंत संचारबंदी

गोव्यात कोरोना संचारबंदी २८ जूनपर्यंत वाढविली आहे. राज्यस्तरीय कोरोना संचारबंदी २८ जूनला सकाळी ७ वाजेपर्यंत वाढविल्याची माहिती मुख्यमंत्री प्रमोद सावंत यांनी ट्विट करून दिली. चित्रपटगृहे, थिएटर, मल्टिप्लेक्स, मनोरंजन क्षेत्राला वगळून मॉलमधील दुकानांना सकाळी ७ ते दुपारी ३ वाजेदरम्यान खुले ठेवण्याची परवानगी दिली आहे. मासळी बाजारही खुले होणार आहेत.

उत्तर प्रदेश – संचारबंदी हटविली

उत्तर प्रदेशात गेल्या काही दिवसांपासून कोरोनारुग्णांत घट होत असल्याच्या पार्श्वभूमीवर ८ जूनला सर्व जिल्ह्यांतून कोरोना संचारबंदी हटविण्यात आली आहे. आता सायंकाळी सात ते सकाळी ७ वाजेपर्यंत रात्रीची संचारबंदी असेल. सर्व जिल्ह्यांमध्ये कोरोनाचे सक्रिय रुग्ण ६०० पेक्षा कमी आढळत आहेत. सर्व दुकांनांना सकाळी सात ते सायंकाळी सात वाजेपर्यंत खुले ठेवण्याची परवानगी दिली आहे.

बिहार- १६ जूनपासून शिथिलता

बिहारमध्ये १६ जूनपासून अनलॉक-२ लागू केला आहे. आता सर्व दुकाने एक दिवसाआड सकाळी सहा ते सायंकाळी सहा वाजेपर्यंत खुले ठेवण्याची परवानगी दिली आहे. सरकारी आणि खासगी कार्यालये ५० टक्के उपस्थितीत आता चार वाजेऐवजी सायंकाळी पाच वाजेपर्यंत खुले राहतील. त्याशिवाय रात्रीच्या संचारबंदीत एका तासाची सवलत दिली आहे. रात्रीची संचारबंदी रात्री आठ ते पहाटे पाच वाजेपर्यंत राहणार आहे.

दिल्ली – सम-विषमला पूर्णविराम 

गेल्या रविवारी मुख्यमंत्री अरविंद केजरीवाल यांनी अनलॉक दिल्लीमध्ये आणखी सवलती जाहीर केल्या. आता सोमवारपासून दिल्लीत दुकाने सकाळी दहा वाजेपासून रात्री ८ वाजेपर्यंत खुली राहणार आहे. दिल्ली सरकारकडून जागी मार्गदर्शक सूचनांमध्ये बाजार आणि मॉलसाठी सम-विषम व्यवस्था मागे घेण्यात आली आहे. आता सर्व दुकाने, मॉल आणि सर्व दुकाने पूर्णपणे सुरू राहतील.

महाराष्ट्र – लोकलसेवा बंदच

महाराष्ट्रात २ महिन्यांनंतर ७ जूनपासून अललॉक प्रक्रिया सुरू झाली आहे. राज्याच्या अनेक भागात संचारबंदी शिथिल करण्यात आली आहे. दुकानांसह रेस्टॉरंट आणि जिमसुद्धा सुरू करण्याची परवानगी दिली आहे. बससेवा सुरू असली तरी लोकलसेवा सध्या बंदच राहणार आहे. अनलॉकच्या प्रक्रियेत राज्य सरकारने ऑक्सिजन बेडची उपलब्धता आणि संसर्गाच्या दरावरून जिल्ह्यांना पाच गटात विभागले आहे.

ओडिसा – टप्प्याटप्प्याने शिथिलता

ओडिशामध्ये १६ जूनपासून टप्प्या-टप्प्यात कोरोना निर्बंध शिथिल केले जात आहेत. नव्या मार्गदर्शक सूचनांनुसार, ओडिशात १७ जूनपासून (सकाळी ५ वाजता) सुरू होईल आणि १ जुलै (सकाळी ५ वा.) पर्यंत अंशतः लॉकडाउन राहणार आहे. राज्यातील १३ जिल्ह्यांमधील सकाळी सहा वाजेपासून दुपारी एक वाजेदरम्यान खुली राहणार आहेत.

झारखंड – ३८ तासांचा लॉकडाउन

झारखंड सरकारच्या दिशानिर्देशांनुसार, शनिवारी (१९ जून) सायंकाळी चार वाजेपासून सोमवारी (२१ जून)  सकाळी सहा वाजेपर्यंत म्हणजेच ३८ तासांचा पूर्ण लॉकडाउन लावला आहे. यादरम्यान दूध, औषधांच्या दुकानांना वगळून इतर दुकाने बंद राहतील. संसर्ग रोखण्यासाठी या दिशानिर्देशांची कठोर अंमलबजावणी केली जाणार आहे. राज्यात सलग दुसर्या आठवड्यात ३८ तासांचा पूर्ण लॉकडाउन लावला आहे.