श्रीअरविंद जन्मोत्सव लेखमाला-३४:
श्रीअरविंद क्रांतिकारक ते महायोगी:
प्रभाव क्षेत्राचा साक्षात अनुभव
सुश्री मीरा अल्फासा (श्रीमाताजी) या दि. २४ एप्रिल १९२० रोजी या नित्य वास्तव्यासाठी पाँडिचेरी येथे परतल्या.
पुढे एकदा, पॉंडिचेरीकडे येत असताना त्यांचा अनुभव सांगताना त्या म्हणतात, ”मी जेव्हा जपानहून परत येत होते (१९२० साली) तेव्हा एक घटना घडली. मी समुद्रामध्ये बोटीवर होते आणि असे काही घडेल अशी अपेक्षाही नव्हती. (मी माझ्या आंतरिक जीवनामध्ये, ध्यानामध्ये व्यस्त होते, परंतु शरीराने मी बोटीवर राहात होते.) तेव्हा एकदम, एकाएकी, पाँडिचेरीपासून समुद्रामध्ये दोन मैलावर असताना, हवेतील वातावरण अचानकपणे बदलले आणि मला जाणवले की, “आम्ही श्रीअरविंदांच्या प्रभावक्षेत्रामध्ये प्रवेश करत आहोत.” तो अगदी भौतिक, सघन, ठोस असा अनुभव होता.
पुढे ‘सत्प्रेम’ या आपल्या एका शिष्याशी बोलताना त्या म्हणतात, ”जेव्हा मी जपानवरून परतले तेव्हा आम्ही दोघांनी (श्रीअरविंद आणि मी) एकत्रितपणे कार्य सुरु केले; त्यांनी अगोदरच मनोमय जगतामध्ये अतिमानसिक (supramental) प्रकाश उतरविलेला होता आणि ते मनाचे रूपांतरण करण्याच्या प्रयत्नात होते. श्रीअरविंद मला म्हणाले, “हे खूपच विलक्षण आहे, हे कधीही न संपणारे कार्य आहे. वास्तविक सर्व काही करून झाले आहे तरीही काहीच पूर्ण झाल्यासारखे वाटत नाही आणि त्यामुळे पुन्हापुन्हा, परत एकदा तेच सगळे करावे लागत आहे.”
(क्रमश:)
(सौजन्य : अभीप्सा मराठी मासिक)
Special Article Series ShreeArvind Part34
