सोलापूर (इंडिया दर्पण वृत्तसेवा) – संपूर्ण राज्यात आज जागतिक आदिवासी दिन साजरा करण्यात येत असतानाच सोलापूर जिल्ह्यात एका शाळेतील आदिवासी कर्मचाऱ्यांनी आत्महत्या केल्याची खळबळ जनक घटना घडली आहे. विशेष म्हणजे तो आपल्या कुटुंबासह शेततळ्यात आत्महत्या करणार होता, परंतु त्याची पत्नी व मुले यांचा जीव वाचला, मात्र या घटनेत पत्नी गंभीर जखमी झाली असून शाळेत काम करणाऱ्या या शिपायाला पगार मिळत नसल्याने तणावातून त्यांनी आत्महत्या केल्याचा आरोप मृत शिपायाच्या वडिलांनी केला आहे.
म्हणून होत नव्हता पगार
याबाबत अधिक माहिती अशी की, उत्तर सोलापूर तालुक्यातील मार्डीमध्ये घडलेल्या धक्कादायक घटनेने सर्वत्र खळबळ उडाली आहे, सोलापूर शहरात एका खासगी शाळेतील शिपाई म्हणून काम करणाऱ्या इसमाने आपल्या पत्नी आणि तीन चिमुकल्या मुलांसह शेततळ्यात उडी आत्महत्या करण्याचा प्रयत्न केला होता. हणमंत विठ्ठल काळे हे सोलापूरमधील खासगी शाळेत शिपाई म्हणून काम करत होते. जवळपास १३ वर्षांपूर्वी हणमंत काळे हे शिपाई म्हणून भरती झाले, शालार्थ आयडी नसल्याने एकदाही त्यांचा पगार झाला नाही. याच तणावातून त्यांनी शेततळ्यात उडीमारुन आत्महत्या केली. धक्कादायक बाब म्हणजे पत्नी आणि तीन चिमुकल्या मुलांसह शेततळ्यात उडी आत्महत्या करण्याचा प्रयत्न केला होता. मात्र मुलांनी उडी मारण्याआधीच कुटुंबियांनी त्यांना रोखले तर मृत शिपायाची पत्नी मात्र गंभीर असून सध्या सोलापुरातील खासगी रुग्णलयात उपचार सुरु आहेत.
५ लाखाच्या लाचेची मागणी
शालार्थ आयडीसाठी काही संबंधित अधिकाऱ्यांनी हणमंत काळे यांच्याकडे सुमारे ५ लाख रुपयांची मागणी केली होती, पैसे न दिल्यानेच शालर्थ आयडी दिला नाही. असा आरोप वडील विठ्ठल काळे यांनी केला आहे. विठ्ठल काळे म्हणाले की, ‘गडचिरोली सारख्या दुर्गम व आदिवासी भागात सहाय्यक पोलीस निरीक्षक म्हणून मी सेवा केली, आज आदिवासी दिनाच्या दिवशी आदिवासी कुटुंबातील मुलाचा जीव या संबंधित अधिकाऱ्यांनी घेतला, असे म्हणत जो पर्यंत शासन न्याय देत नाही, तो पर्यंत मुलाच मृतदेह शासकीय रुग्णालयातून नेणार नाही. ‘मृताच्या वडीलांनी अशी भूमिका घेतल्याने संबंधित शासकीय कर्मचारी व प्रशासनापुढे पेच निर्माण झाला आहे.
Solapur School Sepoy Suicide Education Department Bribe
Corruption
