– खाटांची क्षमता १०० असावी खा. गोडसे यांचे पथकाकडे आग्रही मागणी
– माळेगाव, मुसळगाव एमआयडीसीतील भूखंडाची श्रम मंत्रालयाच्या पथकाकडून पाहणी
सिन्नर : सिन्नर तालुक्यात माळेगाव, मुसळगाव या दोन महत्त्वाच्या औद्योगिक वसाहतींमधील (एम.आय.डी.सी.) कामगारांना उच्च दर्जाचे आणि मोफत उपचार मिळावेत, यासाठी खासदार हेमंत गोडसे यांनी केलेल्या प्रयत्नातून गेल्या चार महिन्यांपूर्वी केंद्र शासनाच्या श्रम मंत्रालयाने तीस खाटांच्या स्वतंत्र रुग्णालय उभारणीला मंजुरी दिली आहे. माळेगाव, मुसळगाव येथील औद्योगिक वसाहतींमधील कामगारांच्या आरोग्य स्वास्थसाठी उभारण्यात येणाऱ्या रुग्णालयात कामगारांसह त्यांच्या कुटुंबियांवर मोफत उपचार करण्यात येणार असून सदर रुग्णालय उभारणीच्या हालचाली सुरु झाल्या आहेत. आज गुरुवारी खासदार हेमंत गोडसे यांच्या उपस्थितीत ई.एस.आय.सी.च्या विशेष पथकाने माळेगाव-मुसळगाव औद्योगिक वसाहतीतील प्रस्तावित जागेची पाहणी करण्यात आल्याने रुग्णालय उभारणीसाठी प्रशासकीय स्तरावर हालचाली सुरु झाल्या आहेत. दरम्यान कोरोनाचा वाढता प्रादूर्भाव लक्षात घेवून सदर प्रस्तावित रुग्णालयाची क्षमता ३० खाटांऐवजी १०० खाटांची व्हावी, अशी आग्रही मागणी खा. गोडसे यांनी पथकाच्या प्रमुखांकडे केली आहे.
सिन्नर तालुक्यातील मुसळगाव, माळेगाव या दोन मोठ्या औद्योगीक वसाहती आहेत. येथील कारखान्यांमध्ये सुमारे पन्नास हजार कामगार सतत कार्यरत असतात. सिन्नर, मुसळगाव, माळेगाव, वावी याठिकाणी वर्षोनुवर्षे कामगार आपल्या कुटुंबासह वास्तव्यास आहेत. मात्र येथील कर्मचाऱ्यांना वैद्यकीय उपचारासाठी केंद्र शासनाकडून कोणतीही सुविधा उपलब्ध नसल्यामुळे कामगारांमध्ये नाराजीचा सूर होता. मुसळगाव, माळेगाव औद्योगिक वसाहतीमधील कामगार आणि कुटुंबियांसाठी स्वतंत्र रुग्णालय असावे, यासाठी कामगारांचा खासदार गोडसे यांच्याकडे पाठपुरावा सुरु होता. कर्मचाऱ्यांची मागणी न्यायिक असल्याने खा. गोडसे यांनी केलेल्या अथक प्रयत्नातून जानेवारी महिन्यात केंद्राच्या श्रम मंत्रालयाने सिन्नर एमआयडीसीतील कामगारांसाठी ३० खाटांच्या रुग्णालय उभारणीला मान्यता दिलेली आहे. आजमितीस प्रस्तावित रुग्णालयात तीस खाटांची मंजुरी असली तरी कोरोना प्रादूर्भाव लक्षात घेवून सदर रुग्णालयाची व्याप्ती शंभर खाटांपर्यंत वाढविण्यात येणार आहे.
सदर प्रस्तावित रुग्णालयासाठी जागा मिळविण्यासाठी खा. गोडसे यांनी जिल्हाधिकारी सूरज मांढरे यांच्याकडे पाठपुरावा केला होता. जिल्हाधिकारी मांढरे यांनी प्रस्तावित रुग्णालयासाठी सिन्नर तालुक्यातील मोह आणि मुसळगाव याठिकाणी शासकीय भूखंड असल्याचे स्पष्ट केले होते. सदर प्रस्तावित रुग्णालय उभारणीच्या कामासाठी हालचाली सुरु झाल्या असून आज गुरुवारी खासदार हेमंत गोडसे यांच्यासह ई.एस.आय.सी.चे डेप्युटी डॉयरेक्टर निश्चलकुमार नाथ यांच्या पथकाने सदर भूखंडांची प्रत्यक्ष पाहणी केली. यावेळी माजी आमदार राजाभाऊ वाजे, शिवसेनेचे युवानेते उदय सांगळे, तहसिलदार राहुल कोताडे, श्रम मंत्रालयाचे निश्चचलकमुार नाथ, एस. के. पांडे, जितेंद्र खैरनार आदींसह अधिकारी व कर्मचारी उपस्थित होते. या रुग्णालयाचा फायदा औद्योगिक वसाहतींमधील हजारो कामगार आणि त्यांच्या कुटुंबियांना होणार आहे. या रुग्णालयाच्या माध्यमातून कर्मचारी व त्यांच्या कुटुंबियांना उच्च दर्जाचे उपचार जलद व मोफत मिळणार आहेत. यामुळे कर्मचाऱ्यांमध्ये आनंद व्यक्त करण्यात येत आहे
