सिन्नर- येथील माजी नगराध्यक्ष हरिश्चंद्र गणपत लोंढे ( ६७) यांचे आज पहाटे दिर्घ आजाराने निधन झाले. त्यांच्या पश्चात पत्नी, माजी नगराध्यक्ष भामाताई लोंढे, दोन मुले,एक विवाहीत मुलगी, सूना, नातवंडे असा परिवार आहे. सध्याच्या नगर परिषदेचे विरोधी पक्षनेते नामदेव लोेंढे यांचे ते चुलते होते.
१९८३ पासून १२ वर्ष ते तर ५ वर्ष त्यांच्या पत्नी भामाताई शहराच्या नगराध्यक्ष होत्या. त्यांच्या कार्यकाळात ऐतिहासिक चौदा चौक वाड्यातील अर्धा वाडा नगर पालिकेने ताब्यात घेऊन तेथे व्यापारी संकुल उभारून नगर पालिकेला शास्वत उत्पन्नाचा स्रोत निर्माण केला. शहराच्या चारही बाजूंनी असणाऱ्या टपऱ्यांमुळे शहराला आलेले बकालपण घालवण्यासाठी सरस्वती नदीच्या दोन्ही तिरांवर, वावी वेशीच्या आतल्या बाजूने व्यापारी संकुल बांधून तेथे शहरातील सर्वसामान्यांना व्यापारासाठी हक्काची जागा त्यांनी उपलब्ध करून दिली.
हेमंत वाजे नगराध्यक्ष असताना तत्कालीन राज्यमंत्री तुकाराम दिघोळे यांनी शहरासाठी साडे चौदा कोटींची पाणी पुरवठा योजना मंजूर करून आणल्यानंतर योजनेला विरोध न करता पाठपुराव्यासाठी त्यांनी पुढाकार घेतला. नगर पालिकेच्या हद्दीबाहेर विजय नगर व झापवाडी परिसराला पाणी देण्याचा निर्णय त्यांच्याच कार्यकाळातला. अडी -अडचणीत आलेल्या सर्व जाती धर्माच्या सर्वसामान्यांसाठी त्यांच्या घराचा दरवाजा अर्ध्या रात्री सुध्दा उघडा असायचा. पोलिस ठाण्यात सर्वसामान्यांसाठी ते नेहमीच धाव घ्यायचे. शहरातला कुठलाही महत्वाचा प्रश्न असला तरी लोंढे यांच्या शब्दाला पोलिस निरीक्षक, तहसीलदारही मान द्यायचे.
हिंदू मुस्लिम बांधवांमध्ये कुठेही तेढ निर्माण होऊ नये यासाठी ते नेहमीच सतर्क असायचे. १९९२ ला बाबरी मशीद पाडली गेल्यानंतर काजीपुरा भागात रात्री झोपायला जाऊन मुस्लिम बांधवांची भीती घालवण्याचं कामही त्यांनी केले. दोस्ती या शब्दाला कमालीचे जागणारे, संपूर्ण जिल्ह्यात स्वतःचा मित्र परिवार निर्माण करणाऱ्या हरिभाऊ यांनी प्रसंगी वाईटपणा घेण्यासही मागे पुढे पहिले नाही. स्वतः च्या कामातून त्यांनी स्वतःचा राज्यभर दबदबा निर्माण केला होता. ज्येष्ठ नेते एन.एम. आव्हाड यांना जिल्हा नियोजन मंडळावर घ्यावे यासाठी तत्कालीन मुख्यमंत्र्याना कडक बंदोबस्तातही जाऊन भिडायला ते घाबरले नाहीत.
शहरातील कुठल्याही आंदोलनाला हिंसक वळण लागणार याची त्यांनी नेहमीच काळजी घेतली. शरद पवारांचे चाहते असणाऱ्या हरिभाऊ यांनी सूर्यभान गडाख, तुकाराम दिघोळे, प्रकाशभाऊ वाजे यांच्या नेतृत्वाखाली काम करताना शहराच्या विकासासाठी जास्तीत जास्त निधी आणण्याचे काम केले. सिन्नर सार्वजनिक वाचनालय, गोंदेश्वर सोसायटीसह शहरातील अनेक संस्थांच्या प्रगतीत त्यांनी महत्वाचे योगदान दिले.
कुस्ती हा त्यांचा आवडता छंद. तालुक्यातील पहिलवांनासाठी स्व.ताच्या घरात तालीम बांधणारा त्यांच्यासारखा राजकारणी विरळाच. तालुक्यात कुठेही कुस्तीचा फड त्यांच्याशिवाय रंगतच नव्हता. तालुक्यात कुस्तीला राजाश्रय मिळवून देण्याचे काम त्यांनी केले. गेल्या ५-६ वर्षपासून आजाराने ते अंथरुणाला खिळून होते. तेव्हापासून कुस्ती तालुक्यातून जशी गायबच झाली आहे. त्यांच्या नेतृत्वाखाली दर वर्षी होळीला लिंगटांग वाडीत रंगणाऱ्या टांग्याच्या स्पर्धांना राज्यभरातून टांगा शौकीन हजेरी लावत असत. त्यांच्या घरी वर्षभर चालणाऱ्या भोजनावळीत भजीच्या आमटीचा अस्वाद घेण्यासाठी नेहमीच गर्दी बघायला मिळायची. त्यांच्या जाण्याने शहराच्या विकासासाठी कुणाशीही पंगा घेणारा, कुठलीही तडजोड न करता निर्णय घेणाऱ्या धाडसी नेतृत्वाला तालुका मुकला असल्याची भावना व्यक्त होत आहे.
Follow India Darpan
ताज्या बातम्या आणि चर्चांसाठी आमच्या सोशल मीडियावर जोडा!
ग्रामीण ते शहरी आणि जुन्या ते नव्या अशा सर्वच पातळीवर आम्ही विकास पत्रकारितेला अधिक महत्त्व देतो. समाजोन्नती व्हावी, लोकशाही बळकट व्हावी, अन्यायाला वाचा फोडावी आणि विधायक कार्य घडावे यासाठी आम्ही आग्रही आहोत.
