सिन्नर (इंडिया दर्पण वृत्तसेवा) – सिन्नर-घोटी महामार्गावर लोणारवाडी परिसरात दोन बोलेरो, एक पीकअप व एक दुचाकी अशा चार वाहनांचा विचित्र अपघात झाला आहे. रात्री 8 वाजेच्या सुमारास झालेल्या या अपघातात दोन बोलेरो वाहनांचा चक्काचूर झाला आहे. तर, चार जण गंभीर जखमी झाले आहेत.
पोलिसांनी दिलेल्या माहितीनुसार, सिन्नरकडून घोटीच्या दिशेने जाणारी पीकअप (क्र. एम.एच. 15/ एस. व्ही. 4193) ही लोणारवाडी शिवारात आली. त्याचवेळी या पीकअपची बोलेरो (एम. एच.15/ सी. टी. 7632) शी धडक झाली. मागून येणाऱ्या बोलेरो (क्र. एम. एच. 15/ डी. सी. 1441) ला जोरदार धडक बसली. त्याचवेळी पल्सर मोटारसायकललाही धडक बसली. या विचित्र अपघातात पिकअपची एक बाजू घासली गेली तर दोन्ही बोलेरोंच्या पुढील बाजूंचा पूर्णपणे चक्काचूर झाला. अपघात दोन्ही बोलेरोंमधील 4 जण गंभीर जखमी झाले आहे. सुदैवाने मोटारसायकलस्वार व पिकअप चालक थोडक्यात बचावले.
स्थानिकांनी तात्काळ मदत करत जखमींना वाहनांतून बाहेर काढले. सिन्नरच्या श्री स्वामी समर्थ रुग्णवाहिकाचालक गणेश काकड यांनी तात्काळ घटनास्थळी येत जखमींना शहरातील खाजगी रुग्णालयात दाखल केले. अपघातात एक बोलेरोची पुढील व मागील बाजूचा चक्काचूर होऊन रस्त्याच्या कडेला असलेल्या नालीत ती फेकली गेली. तर दुसरी बोलेरो व पीकअप भररस्त्यात पडल्याने दोन तास महामार्गावर वाहतुकीस खोळंबा झाला. पोलिसांनीही घटनास्थळी येत वाहतूक सुरळीत केली. माजी आमदार राजाभाऊ वाजे यांना घटनेची माहिती मिळताच त्यांनी तात्काळ घटनास्थळी येत जखमींना वाहनाबाहेर काढण्यास मदत केली. तसेच वाहतूक सुरळीत करण्यासाठी स्थानिकांना मदत करण्याचे आवाहन केले. सिन्नर पोलिसांकडून अधिक तपास सुरू आहे.
