धक्कादायक! तब्बल ३० विद्यार्थ्यांना एकाच सिरिंजने लसीकरण; असे झाले उघड

इंडिया दर्पण ऑनलाईन डेस्क – संपूर्ण भारत देशात सुमारे दोन वर्ष कोरोनाने हाहाकार माजला होता, त्यात लाखो रूग्णांचे बळी गेले तर कोट्यावधी नागरिकांना रुग्णालयात दाखल व्हावे लागले होते. त्यानंतर संपूर्ण देशभरात लसीकरण मोहीम राबविण्यात आली. अद्यापही मोहीम सुरूच आहे, त्याचवेळी कोरोनापासून बचाव करण्यासाठी भारतात लसीचे कोट्यावधी डोस लागू करण्यात आले आहेत.
मात्र, मध्य प्रदेशातून एक धक्कादायक बाब समोर आली आहे. मध्यप्रदेशातील सागरच्या जैन पब्लिक स्कूलमध्ये कोरोना लसीकरणात गंभीर निष्काळजीपणा करत ३० मुलांना एकाच सिरिंजने लसीकरण करण्यात आले. ही बाब उघडकीस येताच स्थानिक प्रशासनात खळबळ उडाली आहे.

या शाळेत कोरोना लसीकरण शिबिर आयोजित करण्यात आले होते. यासाठी आरोग्य विभागाने नर्सिंग कॉलेज एसव्हीएन या खासगी कॉलेजमध्ये शिकणाऱ्या नर्सिंग विद्यार्थ्यांची ड्युटीही लावली होती. यादरम्यान जितेंद्र राज नावाच्या तृतीय वर्षाच्या विद्यार्थ्याने मुलांचे लसीकरण सुरू केले. त्यांनी एकाच सिरिंजने सुमारे ३० मुलांना लसीकरण केले. एका विद्यार्थ्याचे वडील दिनेश नामदेव यांच्या नजरेस पडल्यावर ही बाब उघडकीस आली.

यानंतर शाळेत एकच गोंधळ उडाला. गोंधळ वाढल्याने विद्यार्थी जितेंद्रला घटनास्थळावरून हटवण्यात आले. याबद्दल दिनेश नामदेव यांच्या म्हणण्यानुसार, लस लावणाऱ्या व्यक्तीला त्याच सिरिंजबाबत विचारणा केली असता त्यांनी सांगितले की, एचओडी सरांनी सर्वांना एकाच सिरिंजने लस लावण्यास सांगितले आहे. मात्र या निष्काळजीपणामुळे मुलांचे काही झाले तर त्याची जबाबदारी कोण घेणार, प्रशासन की सरकार? इंग्रजांच्या काळातही असे घडले नाही. या प्रकरणी मुख्यमंत्री कार्यालयाने चौकशीचे आदेश दिले आहेत. त्याचबरोबर सोशल मीडियावरही नागरिक या प्रकरणावर आपल्या प्रतिक्रिया देत आहेत.

दिलीप वर्मा नावाच्या युजरने राज्याचे मुख्यमंत्री शिवराज सिंह चौहान यांना प्रश्न विचारताना लिहिले, “मुख्यमंत्री मामाजी हे काय चालवले आहे? कधी कधी रस्ता खचतो, शाळेच्या वर्ग खोलीत पाणी टपकते आणि आता एकाच सिरिंजने 30 मुलांना धोका आहे का? त्याचबरोबर जुबेर अख्तर यांनी लिहिले की, “आज सामान्य माणसाचे आयुष्य दोन पैशांनी कमी झाले आहे. हे आजचे भारताचे सर्वात मोठे सत्य आहे.” अनिमेश यांनी टोमणे मारत लिहिले, “सरकार देशाच्या हितासाठी खर्च वाचवत आहे आणि त्यांना प्रत्येकासाठी नवीन सिरिंजची गरज आहे.”

shocking 30 students vaccinated from one syringe Madhya Pradesh