उद्धव यांना शह देण्यासाठी एकनाथ शिंदेंचे आता ‘मिशन १८८’; काय आहे ते?

मुंबई (इंडिया दर्पण वृत्तसेवा) – शिवसेना पक्ष प्रमुख उद्धव ठाकरेंसाठी पुढचे दिवस चांगले नसल्याचे दिसून येत आहे. शिवसेनेचे बंडखोर नेते तथा मुख्यमंत्री एकनाथ शिंदे यांनी निवडणूक आयोगाकडे त्यांच्या गटाचे नाव शिवसेना ठेवण्याची मागणी केली आहे. यासोबतच त्यांनी आपले निवडणूक चिन्ह धनुष्यबाण सुद्धा मागितले आहे. शिवसेनेचे अनेक आमदार, खासदार आणि नगरसेवक शिंदे यांच्या बाजूने आले असले तरी शिवसेनेवर पूर्ण वर्चस्व मिळवण्यासाठी शिंदे यांना अजून एका विजयाची गरज आहे. त्यासाठी शिंदे यांनी मिशन १८८ सुरू केल्याचे समजते. जाणून घ्या काय आहे हे मिशन…

शिवसेनेचे आमदार-खासदार फोडून मुख्यमंत्री एकनाथ शिंदे यांनी संपूर्ण पक्ष संघटना ताब्यात घेण्यासाठी निर्णायक पावले उचलण्यास सुरुवात केली आहे. एकनाथ शिंदे यांनी केंद्रीय निवडणूक आयोगाला पत्र पाठवले आहे. त्यात आपल्या संघटनेला शिवसेना म्हणून मान्यता द्यावी आणि शिवसेनेचे धनुष्यबाण हे चिन्ह मिळावे अशी मागणी केली आहे. मात्र, शिवसेनेचे आमदार, खासदार आणि नगरसेवक या मुद्यावर मोठ्या प्रमाणात विभागले जात असले तरी एकनाथ शिंदे यांना शिवसेना संघटना सांभाळणे सोपे नाही.

शिवसेनेच्या संघटनेत सर्वात महत्त्वाच्या समजल्या जाणाऱ्या लोकप्रतिनिधी सभागृहात २८२ सदस्य आहेत. एकनाथ शिंदे यांना आता या १८८ सदस्यांपैकी दोन तृतीयांश सदस्यांच्या पाठिंब्याची गरज आहे. हे शिंदे यांचे मिशन १८८ आहे. हे सदस्य आपल्या बाजूने घेण्यात त्यांना यश आले, तरच शिवसेनेचे वर्चस्व उद्धव ठाकरेंकडून शिंदे यांच्याकडे जाऊ शकते. एकनाथ शिंदे यांचे मिशन १८८ लक्षात आल्याने उद्धव ठाकरे सतर्क झाले आहेत. त्यामुळेच उद्धव यांनी पुत्र आदित्यच्या मदतीने संघटना मजबूत करण्यावर भर दिला आहे. याचाच एक भाग म्हणून आदित्य ठाकरे यांनी महाराष्ट्र दौरा सुरू केला आहे. तर, उद्धव हे ठाण्यातील शिवसेना भवनामध्ये प्रत्येक जिल्ह्याच्या पदाधिकारी व कार्यकर्त्यांची बैठक घेत आहेत.

शिवसेनेच्या घटनेत ‘शिवसेना प्रमुख ते शाखा प्रमुख’ अशी एकूण १३ पदे आहेत. मुंबईत आमदार, खासदार, जिल्हाप्रमुख, जिल्हा संपर्क प्रमुख आणि विभाग प्रमुखांची प्रतिनिधी सभा आहे. प्रतिनिधीगृहात एकूण २८२ सदस्य आहेत. शिवसेना प्रतिनिधी सभेच्या २८२ सदस्यांपैकी किमान दोन तृतीयांश सदस्यांनी एकनाथ शिंदे गटाला पाठिंबा दिल्यास उद्धव ठाकरे अडचणीत येण्याची शक्यता आहे. त्याचदृष्टीने शिंदे कामाला लागले आहेत. विशेष म्हणजे, त्यांच्या या सर्व कार्यात भाजपचा त्यांना छुपा पाठिंबा आणि मदत असल्याचे बोलले जात आहे.

Shivsena Rebel Leader Eknath Shinde Mission 188 against Uddhav Thackeray Maharashtra Politics