इंडिया दर्पण ऑनलाईन डेस्क
ठाकरे गटाने हकालपट्टी केलेले सुधाकर बडगुजर हे भाजपमध्ये प्रवेश करणार असतांना दुसरीकडे शिवसेना ठाकरे गटाचे चार माजी नगरसेवक व अनेक शिवसैनिकांनी मुंबईत शिंदे गटात उपमुख्यमंत्री एकनाथ शिंदे यांच्या उपस्थितीत प्रवेश केला. शिंदे गटात प्रवेश करणा-यांमध्ये किरण दराडे, सीमा निगळ, पुंडलिक अरिंगळे, पुंजाराम गामने यांची नावे आहेत. आतापर्यंत शिंदे गटात २० माजी नगरसेवकांनी प्रवेश केला असून काही जण पक्ष प्रवेशाच्या प्रतिक्षेत आहेत.
भाजपमध्ये बडगुजर यांच्याबरोबर शिवसेना ठाकरे गटाचे माजी मंत्री बबन घोलप हे सुध्दा प्रवेश करणार आहेत. त्यामुळे ठाकरे गटाला मोठा धक्का बसला आहे. नाशिक महानगरपालिकेच्या निवडणुकीच्या पार्श्वभूमीवर ठाकरे गटाला गळती लागली असून अनेक जुने शिवसैनिक पक्ष सोडून भाजप व शिंदे गटात प्रवेश करत आहेत.
शिंदे गटात चार माजी नगरसेवकांबरोबरच अनेक शिवसैनिकांनी ठाकरे गटाला सोडचिठ्टी देत शिंदे गटात प्रवेश केला आहे. या प्रवेश सोहळ्यात नाशिकचे शिंदे गटाचे पदाधिकारी मोठ्या संख्येने उपस्थित होते.
