मुंबई (इंडिया दर्पण वृतसेवा) – टाटा समुहातील कंपन्यांचे शेअर्स उत्तम परतावा देत असल्याचे वारंवार स्पष्ट होते. आताही टाटा टेलिसर्व्हिसेस लिमिटेड (TTML) मध्ये ज्या गुंतवणूकदारांनी वर्षभरापूर्वी पैसे गुंतवले होते, ते आता श्रीमंत झाले आहेत. कारण एका वर्षात या टेलिकॉम कंपनी टीटीएमएलने 1207 टक्के परतावा दिला आहे. म्हणजेच वर्षभरापूर्वी ज्याने त्यात एक लाख रुपये गुंतवले असतील, त्याचे एक लाख 13 लाख 7 हजार रुपये झाले असतील. कारण, वर्षभरापूर्वी त्याची किंमत 10.45 रुपये होती. दि. 11 जानेवारी रोजी टीटीएमएलचा स्टॉक 290.15 रुपयांच्या सर्वकालीन उच्चांकावर बंद झाला होता.
दि. 8 मार्च रोजी हा स्टॉक 93.40 रुपयांवर खाली आला होता आणि आज NSE वर अपर सर्किटसह 183.75 रुपयांवर आहे. तसेच हा समभाग 290.15 रुपयांवरून 93.40 रुपयांपर्यंत घसरल्यानंतर मागील अनेक सत्रापासून अप्पर सर्किटने व्यवहार करत आहे.
तीन वर्षांत 6025 टक्के परतावा :
या शेअरने गेल्या एका आठवड्यात 15.42 टक्के परतावा दिला असला तरी महिनाभरापूर्वी आणि आजपर्यंत ज्याने या शेअरमध्ये पैसे गुंतवले आहेत, त्यांना 78.92 टक्के परतावा मिळत आहे. तथापि, ज्यांनी TTML चे शेअर्स 3 महिन्यांपूर्वी खरेदी केले होते ते अजूनही 19.21 टक्के तोट्यात आहेत, तर 3 वर्षात 6025. टक्के परतावा दिला आहे.
61.25 लाखांवर झेप :
तीन वर्षांपूर्वी या शेअरमध्ये एक लाख रुपये गुंतवणाऱ्या गुंतवणूकदारांच्या पैशांनी आता 61.25 लाखांवर झेप घेतली आहे. 35921 कोटी रुपयांचे बाजार भांडवल असलेल्या या टाटा समूहाच्या कंपनीच्या शेअर्समध्ये गुंतवणूक करणाऱ्या गुंतवणूकदारांची सुमारे महिनाभरापूर्वीपर्यंत निराशा झाली होती. कंपनीचे तिमाही निकाल समोर आल्यानंतर हा शेअर लोअर सर्किट दाखवत राहिला.
वर्षभरापूर्वीच्या तिमाहीत 298 कोटींचा तोटा
Tata Teleservices Ltd. समायोजित सकल महसूल (एजीआर) देय रकमेशी संबंधित व्याज इक्विटीमध्ये रूपांतरित करण्याच्या (टीटीएमएल) निर्णयामुळे स्टॉकमध्ये मोठी घसरण झाली. यानंतर कंपनीने आपला निर्णय रद्द केला, त्यानंतर काही दिवस स्टॉकने उसळी घेतली, परंतु डिसेंबर 2021 ला संपलेल्या तिसऱ्या तिमाहीत कंपनीला 302 कोटी रुपयांचा निव्वळ तोटा झाल्याच्या वृत्तानंतर, दररोज लोअर सर्किट होऊ लागले. वर्षभरापूर्वीच्या तिमाहीत 298 कोटींचा तोटा झाला होता.
TTML काय करते?
TTML ही Tata Teleservices ची उपकंपनी आहे. ही कंपनी तिच्या सेगमेंटमध्ये मार्केट लीडर आहे. कंपनी व्हॉईस, डेटा सेवा पुरवते. कंपनीच्या ग्राहकांच्या यादीत अनेक मोठी नावे आहेत. बाजारातील जाणकारांच्या मते, गेल्या महिन्यात कंपनीने कंपन्यांसाठी स्मार्ट इंटरनेट आधारित सेवा सुरू केली आहे. कंपन्यांना जलद इंटरनेट आणि ऑप्टिमाइझ्ड नियंत्रणासह क्लाउड आधारित सुरक्षा सेवा मिळत असल्याने याला प्रचंड प्रतिसाद मिळत आहे.
