मुंबई – राष्ट्रवादी काँग्रेसचे अध्यक्ष शरद पवार यांनी आज पत्रकार परिषदेत एक भन्नाट किस्सा सांगितला. राष्ट्रवादीचे प्रदेशाध्यक्ष जयंत पाटील यांच्या पुत्राचा हा किस्सा होता. विशेष म्हणजे, पाटील हे पवार यांच्या शेजारीच बसलेले होते. पवार म्हणाले की, आमच्या प्रदेशाध्यक्षांच्या चिरंजीवाने एक कमाल केली आहे. त्याच्या प्रेमिकेला प्रपोज करण्यासाठी तो थेट आयफेल टॉवर येथे गेला होता. तेथे त्याने प्रपोज केले. त्याला होकार मिळाला आहे. याचा अर्थ आम्ही केवळ इस्लामपूरपर्यंत सिमीत नाही तर थेट पॅरिस पर्यंत गेलो आहोत. ठिकाण इंटरनॅशनल असलं तरी दोन्ही मुलं आणि मुली डोमेस्टिक आहेत. स्थानिक असल्याने त्यांचं लग्नही येथेच होणार आहे. यापुढं आम्हाला काळजी घ्यावी लागेल. कारण, आमची मुलं कुठे जाऊन नक्की काय करतील, हे सांगता येत नाही. पवार यांनी हे सांगताच संपूर्ण सभागृहात हास्यकल्लोळ पहायला मिळाला.
