नाशिक – सार्वजनिक वाचनालय, नाशिक या संस्थेची सन – २०२२ ते २०२७ ची पंचवार्षिक निवडणुकीची प्रारूप मतदार यादी तयार करण्याची प्रक्रिया संस्थेने सुरु केली आहे. या पार्श्वभूमीवर मतदानास पात्र मतदार होण्यासाठी ३१ मार्च,२०२२ अखेर पावेतोची मासिक सभासदांची वार्षिक वर्गणी भरणे आवश्यक आहे. घटनेच्या तरतुदीनुसार ज्या मासिक सभासदांची वर्गणी बाकी किंवा थकीत आहे अशा सभासदांना मतदानाचा अधिकार प्राप्त होणार नाही. त्यामुळे ज्या मासिक सभासदांची वर्गणी थकीत अथवा बाकी असेल अशा सभासदांनी त्यांची वर्गणी रक्कम ७ मार्च, २०२२ संध्याकाळी ७.३० वा. पावेतो सावानाच्या कार्यालयात भरणा करावी व पावती घ्यावी.
ज्या सभासदांची थकीत अथवा बाकी वर्गणी ७ मार्च २०२२ पर्यंत भरलेली असेल त्यांचीच नावे प्रारूप व नंतर अंतिम मतदार यादीत समाविष्ट करण्यात येतील याची सर्वसाधारण सभासदांनी नोंद घ्यावी. थकीत अथवा बाकी असलेली मासिक वर्गणी रक्कम वरील मुदतीत सावाना कार्यालयात कार्यालयीन वेळेत भरणा करावी असे आवाहन वाचनालयाचे कार्याध्यक्ष संजय करंजकर, प्रमुख सचिव जयप्रकाश जातेगावकर, सहा.सचिव प्रा.डॉ.शंकर बोऱ्हाडे, अर्थसचिव उदयकुमार मुंगी व कार्यकारी मंडळाने केले आहे.
