लवकरच उलगडणार ‘सातव्या मुलीची सातवी मुलगी’ नावामागचं रहस्य; १ तासाचा विशेष एपिसोड

इंडिया दर्पण ऑनलाईन डेस्क – छोट्या पडद्यावरील मालिका या घराघरात लोकप्रिय असतात. घरोघरी दिवसातील काही काळ खास त्यासाठी राखून ठेवलेला असतो. यातही ‘झी मराठी’ वाहिनी पूर्वीपासून दर्जेदार मालिकांसाठी ओळखली जाते. सध्या या वाहिनीवर सुरू असलेली ‘सातव्या मुलीची सातवी मुलगी’ ही मालिका प्रेक्षकांच्या पसंतीस उतरली आहे. वेगळे कथानक, वेगळा विषय यामुळेच प्रेक्षकांचा याला चांगला प्रतिसाद मिळतो आहे.

‘सातव्या मुलीची सातवी मुलगी’ ही मालिका अल्पावधीतच प्रेक्षकांच्या पसंतीस उतरली आहे. पण मालिकेतील नेत्राला तिच्या विशेष शक्तीमुळे सगळ्यांच्या रोषाला सामोरे जावे लागते. यासोबतच या मालिकेच्या नावाबाबतही प्रेक्षकांच्या मनात कुतूहल आहे. प्रेक्षकांच्या या प्रश्नाचं लवकरच उत्तर मिळणार आहे. नेत्राला ‘सातव्या मुलीची सातवी मुलगी’ असं का म्हटलं जातं आणि या नावामागचं रहस्य काय आहे हे प्रेक्षकांना येत्या रविवारी, १२ फेब्रुवारीला दुपारी १ आणि रात्री ८ वाजता पाहायला मिळणार आहे.

https://twitter.com/zeemarathi/status/1623548520090443777?s=20&t=uAlISpWbirkR14gliLt6uQ

मालिकेचा रोजचा ट्रॅक हा उत्कंठा वाढवणारा आहे. राजाध्यक्षांच्या घरातील अनेक गोष्टींना रुपाली जबाबदार असल्याचे प्रेक्षकांना नेत्राच्या नजरेतून समजले आहेच. यासोबतच ममताच्या मृत्यूला जबाबदार कोण, त्रिनयना देवीच्या मंदिरातील रहस्य असलेला ग्रंथ कोणी चोरला आणि राजाध्यक्ष कुटुंबातील जीवघेण्या कारस्थानामध्ये कोणाचा हात आहे, हे देखील प्रेक्षकांना लक्षात आलं आहे. मात्र, नेत्राला हे सत्य तिच्या दिव्यशक्तीने कळलेलं असल्याने तिला इतरांना हे सांगताना सिद्ध करण्याचे मोठे आव्हान असणार आहे. रुपालीने ग्रंथातील रहस्य समजावून घ्यायला सुरुवात केल्यापासून तिच्या मार्गात अनेक अडथळे येत आहेत. तर दुसरीकडे नेत्रा अद्वैतच्या मनातील ममताबद्दलचा गैरसमज दूर करण्यासाठी प्रयत्नशील आहे. अद्वैतसुद्धा नेत्राने सांगितलेल्या गोष्टींवर विश्वास ठेऊन ममताच्या बाबतीत पुन्हा एकदा विचार करायचं ठरवतो.

ग्रंथ वाचण्यासाठी रुपाली हेमाची मदत घेते. त्यातूनच नेत्राला हरवणं सोपं नाही, हे रुपालीला कळतं. तिच्याकडे असलेल्या दिव्यशक्तीमुळे ती आपला प्रत्येक डाव उधळून लावणार असल्याचेही तिच्या लक्षात येत. नेत्राची देवीवर गाढ श्रद्धा आणि विश्वास आहे. ग्रंथात लिहिलेल्या ‘सातव्या मुलीची सातवी मुलगी’ या ओळींपर्यंत रुपालीला अर्थ कळतो आणि या ओळीच्या पुढे लिहिलेलं रहस्य कळल्यावर रुपालीला आपली हार स्पष्ट दिसते. नेत्राची आई ही सातवी मुलगी आणि नेत्रा तिची सातवी मुलगी हा या मालिकेच्या नावामागचा एक अर्थ प्रेक्षकांना माहित आहे. परंतु या नावामागचं रहस्य येत्या रविवारी १२ फेब्रुवारी रोजी महाएपिसोडमध्ये प्रेक्षकांना पाहायला मिळणार आहे.

https://twitter.com/zeemarathi/status/1623288865065934848?s=20&t=uAlISpWbirkR14gliLt6uQ

Satvya Mulichi Satvi Mulgi TV Serial Special Episode