डांगसौंदाणे – ग्रामदैवत जलदुर्गा यात्राउत्सव मोठ्या उत्साहात संपन्न, चांदवडचा धर्मा शिंदे ठरला जलदुर्गा केसरी

निलेश गौतम
डांगसौंदाणे– येथील जलदुर्गा यात्राउत्सव मोठ्या उत्साहात संपन्न झाला तीन दिवसीय यात्रे निमित्त विविध सांस्कृतिक, धार्मिक, कार्यक्रमांचे आयोजन करण्यात आले होते. रथ मिरवणूकीने सुरुवात झालेल्या यात्रेची सांगता हभप निवृत्ती नाथ महाराज इंदोरीकर यांच्या किर्तनाने झाली. यात्रेनिमित्त झालेल्या कुस्त्यांच्या दंगलीत चांदवड तालुक्यातील सुतारखेडे येथील पहिलवान धर्मा शिंदे हा यंदाचा जलदुर्गा केसरी ठरला त्याने मानपत्रा सह ५१०० रुपयांचे रोख बक्षीस जिंकले त्याने मागील ३ वर्ष सतत जलदुर्गा केसरी ठरलेला दत्ताचे शिंगवे येथील नारायण मार्तंडला चितपट केले. शंभरहून अधिक लहान मोठ्या कुस्त्यांची दंगल या वेळी झाली. चाळीसगाव ,निफाड ,चांदवड ,देवळा, मालेगाव, लखमापुर आदी ठिकाणाहून आलेल्या पाहिलवानाणी आपले कसब दाखविले. यात्रे दरम्यान महाप्रसादाचे आयोजन करण्यात आले होते. तर पंचक्रोशीतील भाविक भक्तांनी मोठ्या प्रमाणावर यात्रे दरम्यान ग्रामदैवत जलदुर्गाचे दर्शन घेऊन यात्रेस हजेरी लावली. रथपूजन पोलीस निरीक्षक सुभाष अनमूलवार यांनी केले. तर रथ मिरवणुकी दरम्यान तरुणासह आबालवृद्धानी सहभाग घेत गावातून सहवाद्य मिरवणूक काढली. सालाबादाप्रमाणे गुलाब पगारे यांनी देवीचा मुखवटा परिधान करीत रथ मिरवणुकीत सहभाग घेतला होता. यात्रेच्या सांगते निमित्त झालेल्या समाज प्रबोधनकार हभप निवृत्ती नाथ महाराज इंदोरीकर यांच्या झालेल्या किर्तनास पंचक्रोशीसह तालुका भरातून मोठी गर्दी झाली होती.