सटाणा- लग्‍नासाठी कारने जात असतांना साक्री तालुक्यातील पिंपळनेर जवळील दिघावे फाट्या जवळ असलेल्या विहिरी कार पडल्याने चार जणांचा दुर्दैवी मृत्यू झाला. तर तर एक जण सुखरुप बचावले. सटाणा येथील रहिवाशी शंकर यादवराव बोडखे हे स्वमालकीच्या कार (क्र. एमएच ०२, १७४०) मधून जात असतांना हा अपघात झाला. चालकाचा वाहनावरील ताबा सुटल्याने कार दिघावे फाट्यावरील कासारेचे शेतमालक मिलिंद जयवंतराव देसले यांच्या विहिरीत पडली.
या अपघातात कार चालवत असणारे शंकर बोडखे (रा. सटाणा) हे कारमधून सुखरूप बाहेर पडले. परंतु त्यांची पत्नी गौरी बोडखे, (वय ३५), मुलगी श्रद्धा (वय १५), मुलगा तन्मय (वय १२) व दिघावे येथील नात्‍यातील युवती भूमिका योगेश पानपाटील (वय १२) हे पाण्यातच मृत झाले. कार चालवत असलेले शंकर बोडखे घडलेल्‍या प्रसंगाने इतके घाबरले होते, की त्यांना एक तास काहीच सुचले नाही, एका ठिकाणी बसून केवळ ते पाहत राहिले.
गाव धावले मदतीला
कासारे येथे घटना कळताच सरपंच विशाल देसले, पोलीस पाटील दिपक काकूस्ते, मनसेचे धिरज देसले, ग्रामपंचायत सदस्य बाळा खैरनार, जितेंद्र देसले यासह तरुण तात्काळ मदतीसाठी धावले. मदतकार्यासाठी लागणारे सर्व साहित्य उपलब्ध करत अवघ्‍या काही वेळातच मदतकार्य केल्यामुळे शंकर बोरसे यांना वाचविण्यात यश आले. इतर कुटुंबीय मात्र मृत झाले. साक्री पोलिसांनी घटनास्थळी धाव घेतल्याने विहिरीतून तरुणांच्या मदतीने कार बाहेर काढली. घटनास्थळी पोलिसांनी भेट दिली. सायंकाळी उशिरापर्यंत घटनास्थळी पंचनामा सुरु होता. विहिरीतून मृत व्यक्तींची प्रेते काढण्याचे काम चालू होते.
बोडखेचे वेल्डिंग वर्कशाॅप
सटाणा शहरात शंकर बोडेखे यांचे वेल्डींग वर्कशॅाप आहे. या अपघातात चार जण दगावल्याचे वृत्त सायंकाळी सटाणा येथे कळाले. ते राहत असलेल्या परिसरात हळहळ व्यक्त केली जात आहे.
Follow India Darpan
ताज्या बातम्या आणि चर्चांसाठी आमच्या सोशल मीडियावर जोडा!
ग्रामीण ते शहरी आणि जुन्या ते नव्या अशा सर्वच पातळीवर आम्ही विकास पत्रकारितेला अधिक महत्त्व देतो. समाजोन्नती व्हावी, लोकशाही बळकट व्हावी, अन्यायाला वाचा फोडावी आणि विधायक कार्य घडावे यासाठी आम्ही आग्रही आहोत.
