सटाणा (इंडिया दर्पण वृत्तसेवा) – सटाणा पोलीसांनी अट्टल सोनसाखळी चोरांना जेरबंद करून त्यांच्या कडुन जवळपास १ लाख ९४ हजार रुपये किमतीचे सोन्याचे दागिने हस्तगत करण्यात यश येवून दोन आरोपींना बेड्या ठोकल्या आहेत. या मुळे शहरातील गतकाळातील अनेक छोट्या मोठ्या घरफोडी बद्दल अधिक माहिती समोर येणार असल्याने पोलीस स्टेशन चे प्रभारी अधिकारी चिलूमुला रजनीकांत यांनी सांगितले आहे.
या बाबत सविस्तर वृत्त असे कि सटाणा येथिल न्यु प्लांट कचेरी रोडवरील चंद्रकला रमेश वाघ यांच्या घरात तेथील महिला घरकामात मग्न असल्याचे बघून दोन्ही संशयीत आरोपी यांनी घरात घुसून घरातील कपाटात असलेले सोन्याचे दागिने व रोख रक्कम हातोहात घेऊन पोबारा केला होता या बाबत घरात चोरी झाल्याचे लक्षात येताच चंद्रकला वाघ यांनी सटाणा पोलीसात भादंवि ३८० प्रमाणे गुन्हा दाखल केला होता.
सटाणा पोलीस स्टेशन चे प्रभारी अधिकारी तथा सहाय्यक पोलीस अधीक्षक चिलूमुला रजनीकांत, सहाय्यक पोलीस निरीक्षक किरण पाटील सहाय्यक पोलीस निरीक्षक उज्ज्वलसिंग राजपुत पोलीस उपनिरीक्षक विजया पवार पोलीस हवालदार जिभाऊ पवार, धनंजय बैरागी, वाडीलाल जाधव यांनी तपासाचे चक्र फिरवून व परिसरातील सिसिटीवी फुटेज बघून संशयीत आरोपी प्रसाद दादाजी निकम ( वय ३० रा सटाणा ) व त्याचा साथीदार तोफिक अब्दुल शेख ( वय ३१ रा सटाणा ) यांच्या मुसक्या आवळणयात यश आले.
निकम आणि शेख यांची कसून तपासणी केली असता त्यांनी सदरच्या चोरीची कबुली दिली आहे. अजूनही त्यांनी सटाणा शहरासह परिसरात कुठे कुठे घरफोडी करून डल्ला मारला आहे याची माहिती मिळवण्यासाठी सटाणा पोलीस अधिक तपास करीत आहेत. सदरचे सोन्याचे दागिने परत मिळवून आरोपींना बेड्या ठोकल्या बद्दल जिल्हा पोलीस अधीक्षक शहाजी उमाप, अप्पर पोलीस अधीक्षक अनिकेत भारती व पोलीस उप अधिक्षक पुष्कराज सुर्यवंशी यांनी सटाणा पोलीसांचे कौतुक केले आहे
Satana Crime Theft Arrest Police
Nashik District
