कधी काळी 2G तंत्रज्ञानावर समाधान मानणारे आपण 4G तंत्रज्ञान आले तरी नेटवर्क खूपच स्लो आहे, कामे लवकर होत नाही, अशी ओरड करत असतो. परंतु तंत्रज्ञान जसे विकसित होत गेले, तशा आपल्या गरजाही वाढलेल्या दिसतात. या गरजा ओळखूनच माहिती आणि तंत्रज्ञान क्षेत्रातील कंपन्या नवे तंत्रज्ञान शोधण्यासाठी नेहमीच तत्पर असतात. भारतात 5G तंत्रज्ञान येऊ घातलेले असतानाच दक्षिण कोरियाची प्रसिद्ध कंपनी सॅमसंग 6G तंत्रज्ञानाचे संशोधन करत आहे.
4G आणि 5G तंत्रज्ञानानंतर आता अनेक देशांचे 6G तंत्रज्ञानावर संशोधन सुरू असून, ते लवकरच बाजारात आणण्याचे प्रयत्न सुरू झाले आहेत. यादरम्यानच दक्षिण कोरियामधील तंत्रज्ञानात अग्रेसर असलेल्या सॅमसंग कंपनीने दावा केला आहे की, 5Gच्या तुलनेत 6Gच्या संशोधनात ५० पटीने वेग मिळविण्यात कंपनीला यश आले आहे. कंपनीने 5G नेटवर्कवर ५.२३ गिगाबाईट प्रतिसेकंद (Gbps) चा वेग मिळविला आहे, असे सॅमसंग इलेक्ट्रॉनिक्सचे वरिष्ठ अध्यक्ष वोनिल रोह यांनी 5G ट्रान्समिशन उपकरणाच्या सादरीकरणादरम्यान सांगितले.
6G ५० पटीने जलद
सॅमसंगचे एक वरिष्ठ अधिकारी सुंगयून चोई सांगतात, 6G तंत्रज्ञानाला पाहण्यासाठी आम्ही खूपच उत्सुक आहोत. टेरा हर्टझ दळणवळणाच्या सुविधा निर्माण करून आम्ही 6G तंत्रज्ञानाची प्रगतीच दाखवत आहोत. 6G तंत्रज्ञान 5G च्या तुलनेत ५० पटीने गतिमान आहे. 6G स्टँडर्ड पूर्णत्वाकडे जात असल्याने २०२८ पर्यंत याचे व्यावसायिकीकरण होण्याची शक्यता आहे. २०३०पर्यंत मोठ्या प्रमाणात तंत्रज्ञानाचे व्यावसायिकीकरण होऊ शकणार आहे.
6G तंत्रज्ञानाने या क्षेत्रांना मदत
सुंगयून चोई सांगतात, कंपनीतर्फे भविष्यातील तंत्रज्ञानासाठी कृत्रिम बुद्धिमत्ता (आर्टिफिशिअल इंटेलिजेंस), यंत्रमानव (रोबोटिक्स), दृष्य तंत्रज्ञान (व्हिज्युअल टेक्नॉलॉजी) आणि संरक्षण (सिक्योरिटी) या क्षेत्रांमध्ये संशोधन सुरू आहे. मनोरंजन, वैद्यकीय, विज्ञान, शिक्षण या क्षेत्रांमध्ये ऑगमेंटेड रियालिटी, व्हर्च्युअल रियालिटी आणि मिक्स्ड रियालिटी या तंत्रज्ञानाचाही वापर करण्याचे प्रयत्न सुरू आहेत. नेटवर्क ऑपरेशन्सला सोपे बनविण्यासाठी कंपनीने आपल्या बहुतांश सिस्टिमचे व्हर्च्युअलाजेशन केले आहे.
Follow India Darpan
ताज्या बातम्या आणि चर्चांसाठी आमच्या सोशल मीडियावर जोडा!
ग्रामीण ते शहरी आणि जुन्या ते नव्या अशा सर्वच पातळीवर आम्ही विकास पत्रकारितेला अधिक महत्त्व देतो. समाजोन्नती व्हावी, लोकशाही बळकट व्हावी, अन्यायाला वाचा फोडावी आणि विधायक कार्य घडावे यासाठी आम्ही आग्रही आहोत.
