मुंबई –केंद्रीय मंत्री नारायण राणे यांच्यावर सामनाच्या अग्रलेखातून सडकून टीका करण्यात आली आहे. त्यात भोकं पडलेला फुगा नारायण नारायण असा मथळा देऊन हा अग्रलेख लिहण्यात आला आहे. याच अग्रलेखाचे नाशिकमध्ये शिवसेनेने बॅनर करुन ठिकठिकाणी लावले आहे. त्यामुळे पुन्हा शिवसेना – भाजपचा दुसरा अंक सुरु झाल्याचे बोलले जात आहे. या अग्रलेखात म्हटले आहे की, नारोबा राणे यांनी मुख्यमंत्र्यांना मारण्याची सुपारी घेतली आहे.. आता सुपारीबाजांची आरती ओवाळायची काय ? त्यांनी स्वत: च जाहीर केले मी नॅार्मल माणूस नाही, मग आता ते अॅबनॅार्मल आहे का, हे तपासावे लागेल, या अग्रलेखात नारायण राणे हे कधीच महान किंवा कर्तबगार नव्हते. शिवसेनेत असताना त्यांचे नाव झाले ते सत्तेच्या शिड्या जलदगतीने चढता आल्यामुळेच. राणे यांनी शिवसेना सोडल्यावर त्यांचा लोकसभा आणि विधानसभेत चार वेळा शिवसेनेने दणकून पराभव केला. त्यामुळे राणे यांचे थोडक्यात वर्णन करायचेच झाले तर भोकं पडलेला फुगा असेच करता येईल असे म्हटले आहे. आता याच अग्रलेखाचे पोस्टर शिवसेना महानगर व महानगरपालिकेचे विरोधी पक्षनेते अजय बोरस्ते यांनी सर्वत्र लावले आहे.
