मनमाड (इंडिया दर्पण वृत्तसेवा)- अपक्ष उमेदवार माजी खासदार समीर भुजबळ यांच्यामुळे नांदगाव बाजार समितीत कांद्याला दुप्पट भाव मिळाल्याची घटना ताजी असतानाच आता मनमाड बाजार समितीत समीर भुजबळ यांची एन्ट्री होताच मक्याच्या लिलावात तेजी पाहायला मिळाली.त्यामुळे शेतकऱ्यांमध्ये आनंदाचे वातावरण आहे.दरम्यान,असे शुभ संकेत देणारा उमेदवारच शेतकऱ्यांचे कल्याण करू शकतो.त्यामुळे आम्ही भुजबळ यांच्या पाठीशी आहोत, असा ठाम निर्धार शेतकऱ्यांनी बोलून दाखविला आहे.
समीर भुजबळ यांनी मनमाड कृषी उत्पन्न बाजार समितीला आज सकाळी भेट दिली. त्यावेळी तेथे मका लिलाव सुरु होता. भुजबळ यांनी मका लिलावात स्वतः सहभाग नोंदवला. त्यांची ही एन्ट्रीच मका दरावर परिणाम करणारी ठरली. लिलावात तेजी आल्याने शेतकऱ्यांच्या चेहऱ्यावर हास्य फुलले. मका सुपर असेल तर २१०० ते २२०० रुपये तर बी ग्रेड मक्याला २००० रुपये प्रतिक्विंटल भाव मिळत असल्याचे त्यांना दिसून आले. मक्का उत्पादक शेतकरी योगेश दराडे, त्र्यंबक पवार, कृष्णा वाघ, ज्ञानेश्वर बोराडे, सुनील वाबळे, रवींद्र घाडगे, कारभारी कातकडे, बाळासाहेब आव्हाड, प्रवीण शिंदे, जनार्दन शिंदे, बाळू डोंगरे यांचा मका लिलाव सुरू होता. समीर भुजबळ यांच्या उपस्थितीमुळे मक्याचे दर प्रतिक्विंटल १०० रुपयांनी वाढल्याचे सांगत शेतकऱ्यांनी समाधान व्यक्त केले. दरम्यान, ठिकठिकाणी समीर भुजबळ यांचे हस्तांदोलन आणि हात जोडून स्वागत केले जात होते.
जाणून घेतल्या समस्या
यावेळी भुजबळ यांनी बाजार समितीतील विविध समस्या जाणून घेतल्या. व्यापारी, शेतकरी, कर्मचारी आदींनी त्यांना माहिती दिली. यावेळी बाजार समितीचे सभापती दीपक गोगड, संचालक योगेश कदम, आप्पा कुनगर, मधुकर उगले, सचिव बळीराम गायकवाड आदी उपस्थित होते. हमाल, मापारी यांनी त्यांच्या अडीअडचणी भुजबळ यांच्याकडे मांडल्या. वंजारवाडीचे शेतकरी मच्छिंद्र शिंदे म्हणाले की, स्वच्छ पाणी, शौचालय, शेतकरी निवास, चांगले रस्ते यांची बाजार समितीत नितांत गरज आहे.
अशी मंजुरी काय कामाची
सभापती दीपक गोगड म्हणाले की,नजर समितीतील सुविधांसाठी सव्वा दोन लाखांचा प्रस्ताव निवडणुकीच्या तोंडावर मंजूर करण्यात आला.त्यात २४ अटी-शर्थी टाकण्यात आल्या. कामासाठी अडचणीचा डोंगर उभा करून मिळालेली मंजुरी काय कामाची?असा सवाल गोगड यांनी उपस्थित केला.
शेतकरी भवन उभारणार
समीर भुजबळ म्हणाले की,शेतकऱ्यांसाठी भव्य शेतकरी भवन उभारले जाईल.नेहमीच शेतकऱ्यांच्या समस्या सोडविण्याला प्राधान्य दिले जाईल.वचननाम्यात मी पुढील पाच वर्षांच्या विकासाचा आराखडा आपल्यासमोर सादर केला आहे.आता आपण सर्वांनी माझ्या पाठीशी खंबीरपणे उभे राहावे.येत्या २० तारखेला मतदान यंत्रावरील ९ क्रमांकाच्या शिट्टी या निशाणी समोरील बटण दाबून मला विजयी करावे,असे आवाहन भुजबळ यांनी यावेळी केले.
