नांदगाव (इंडिया दर्पण वृत्तसेवा) – नांदगाव विधानसभा मतदार संघामध्ये माजी खासदार समीर भुजबळ हे उमेदवारी करणार असल्याची माहिती समोर आली आहे. या मतदार संघातील माजी आमदार पंकज भुजबळ यांना विधान परिषदेत संधी मिळाल्यानंतर आता या मतदार संघात शिवसेना शिंदे गटाचे आमदार सुहास कांदे यांचा मार्ग मोकळा झाला असे बोलले जात होते. पण, त्यानंतर आता भुजबळ समर्थकांनी समीर भुजबळ हे नांदगावमध्ये लढणार असल्याचे सांगितले.
महायुतीमध्ये ही जागा शिवसेना शिंदे गटाला जाणार हे निश्चित असल्यामुळे आता समीर भुजबळ ही निवडणूक कोणत्या पक्षाकडून लढवतात ही उत्सुकता असणार आहे. ते शरद पवार गट किंवा शिवसेना ठाकरे गटाकडून रिंगणात उतरतात की अपक्ष उमेदवार म्हणून या निवडणुकीत सामोरे जातात हे येत्या काही दिवसात स्पष्ट होईल.
या मतदार संघात पंकज भुजबळ हे दोन वेळेस निवडून आले. पण, २०२९ च्या निवडणुकीत त्यांचा निसटता पराभव झाला. त्यानंतर या मतदार संघात भुजबळ कुटुंबिय सक्रियच होते. या मतदार संघाच्या सिमेला लागूनच येवला विधानसभा मतदार संघ आहे. या ठिकाणी छगन भुजबळ हे आमदार आहे. ते महायुतीकडून निवडणुकीच्या रिंगणात उतरणार आहे. त्यामुळे समीर भुजबळ हे काय निर्णय घेतात हे अद्याप समोर आलेले नाही.
या मतदार संघात शिवसेना ठाकरे गटाकडून माजी नगराध्यक्ष गणेश धात्रक यांचे नाव जवळपास निश्चित आहे. त्यामुळे येथे समीर भुजबळ निवडणुकीच्या रिंगणात उतरले तर तिरंगी लढत होईल.
