इंडिया दर्पण ऑनलाईन डेस्क
राजकारणासाठी शिवस्मारकाचे जलपूजन केले पण ८ वर्षांनंतरही स्मारक अरबी समुद्रात दूरपर्यंत दिसत नाही! अरबी समुद्रात शिवस्मारकाचा दुर्बिणीने शोध घेतला, पण कुठेच महाराजांचे स्मारक दृष्टीक्षेपात आले नाही अशी प्रतिक्रिया छत्रपती संभाजीराजे यांनी दिली. आज ते मुंबईत गेट वे ऑफ इंडिया येथे गेले. त्यानंतर त्यांनी कार्यकर्त्यांसह जहाजातून अरबी समुद्रात शिवस्मारक शोधण्याची मोहिम सुरु केली.
या मोहिमेबाबत ते म्हणाले की, मुंबईच्या अरबी समुद्रात जगातील सर्वात उंच असे जागतिक दर्जाचे भव्य शिवस्मारक साकारू, अशी स्वप्ने शिवप्रेमी जनतेला दाखवत मागील तीन दशकांत राज्यात अनेक सरकारे आली आणि गेली. २४ डिसेंबर २०१६ रोजी भाजप – शिवसेना प्रणित महायुती सरकारने अत्यंत भव्यदिव्य कार्यक्रमाचे आयोजन करत पंतप्रधान नरेंद्र मोदी यांच्या हस्ते अरबी समुद्रात शिवस्मारकाचे जलपूजन केले. स्मारकाच्या कामांस सुरुवात झाल्याच्या अनेक बातम्या आल्या. शासनाच्या रेकॉर्डवर या स्मारकासाठी कोट्यवधी रुपये खर्च देखील झाले आहेत. येत्या काही दिवसांत या जलपूजन कार्यक्रमास आठ वर्षे पूर्ण होतील, मात्र अरबी समुद्रातील हे शिवस्मारक अद्यापही कुठे दिसत नाही. त्यामुळे ही मोहिम सुरु केली आहे.
मुख्यमंत्री एकनाथ शिंदे, उपमुख्यमंत्री देवेंद्र फडणवीस, माजी मुख्यमंत्री उध्दव ठाकरे यांनी निवडणुकीला फक्त शिवाजी महाराजांचं नाव वापरुन मत मागायचे हे मी होऊ देणार नाही असेही त्यांनी सांगितले. यावेळी त्यांनी डीसीपीमधून स्मारक आणि गडकोट किल्ल्यांसाठी किती पैसे खर्च केले असा सवालही त्यांनी केला.
