नाशिक (इंडिया दर्पण वृत्तसेवा) – समाज कल्याण आयुक्तालय, महाराष्ट्र राज्य, पुणे यांच्या आस्थापनेवरील वर्ग-३ संवर्गातील विविध पदांसाठी भरती प्रक्रिया राबवली जात आहे. सदर भरती प्रक्रिया संदर्भात अर्जदार यांच्यासाठी महत्त्वाची सूचना असून सदर ऑनलाईन परीक्षांचे वेळापत्रक जाहीर झाले आहे. सदर कॉम्प्युटरबेस ऑनलाइन परीक्षा ही ४ मार्च ते १९ मार्च २०२५ रोजी विविध सत्रांमध्ये आयोजित करण्यात आली आहे. वरिष्ठ समाज कल्याण निरीक्षक, गृहपाल/अधीक्षक ,समाज कल्याण निरीक्षक, उच्च श्रेणी लघुलेखक, निम्म श्रेणी लघुलेखक व लघु टंकलेखक या संवर्गासाठी ही ऑनलाइन परीक्षा आयोजित करण्यात आलेली आहे. उमेदवारांना २५ फेब्रुवारी २०२५ पासून प्रवेश पत्र ऑनलाइन पद्धतीने या https://sjsa.maharashtra.gov.in संकेतस्थळावर उपलब्ध करून देण्यात येणार आहे , त्यामध्ये महत्त्वाच्या सूचना संदर्भात माहितीचा समावेश असेल.
भरती प्रक्रियेस संबंधित अधिकृत माहिती करिता सामाजिक न्याय व विशेष सहाय्य विभागाच्या https://sjsa.maharashtra.gov.in या संकेतस्थळाला उमेदवारांनी भेट द्यावी तसेच भरती प्रक्रियाच्या अनुषंगाने ऑनलाइन अर्जात नमूद केलेल्या भ्रमणध्वनी व ई-मेल ने वेळोवेळी पाठविण्यात येणाऱ्या सूचनांचे उमेदवारांनी पालन करावे.
सदर भरती प्रक्रियेशी संबंधित हॉल तिकीट ऑनलाइन पद्धतीने उपलब्ध करून घेताना तांत्रिक अडचण असल्यास संबंधित उमेदवारांनी 91-9986638901 या क्रमांकावर संपर्क करावा, सदर क्रमांक सोमवार ते शनिवार सकाळी 9 ते सायंकाळी 6 या कालावधीत सुरू राहील.
सदर भरती प्रक्रिया पारदर्शक पद्धतीने पार पडण्यात येत असून उमेदवारांनी कोणत्याही प्रकारच्या अफवांवर विश्वास ठेवू नये. तसेच कोणत्याही व्यक्तीने सदर भरती प्रक्रिये बाबत गैरमार्गाने नोकरी देण्याचे/परीक्षा पास करून देण्याचे किंवा तत्सम स्वरूपाचे आमिष दाखविल्यास अशा भूलथापांना बळी न पडता त्याबाबत नजीकच्या पोलीस स्टेशन कडे तात्काळ संपर्क करावा, असे आवाहन समाज कल्याण विभागाचे आयुक्त ओम प्रकाश बकोरिया यांनी केले आहे.
