विशेष प्रतिनिधी, नाशिक
कोरोनाच्या संकटात सिन्रर तालुक्यातील राईट टाईट फासनर या कंपनीने कामगारांना मोठा दिलासा दिला आहे. घसघशीत पगारवाढीचा करार कंपनी व्यवस्थापनाने कामगारांसोबत केला आहे. यासाछी महाराष्ट्र नवनिर्माण कामगार सेनेने महत्त्वाची भूमिका बजावली.
मनसे कामगार सेनेचे प्रदेश चिटणीस अंकुश पवार व प्रदेश कार्यकारणी सदस्य संदेश जगताप यांच्या नेतृत्वामध्ये राईट टाईट फास्टनर माळेगांव एम.आय.डी. सी. मधील कामगारांच्या युनियनचा पहिला पगारवाढीचा करार करण्यात आला. त्यामध्ये १३४ कामगारांना कायम करण्यात आले आहे. कोविड-१९ महामारीच्या प्रादुर्भावामुळे मोठ-मोठ्या कंपन्या पगारकपात आणि कामगारकपातीचे धोरण अवलंबत असताना राईट टाईट फास्टनर कंपनीने कामगारांना मोठा दिलासा दिला आहे.
गेल्या १८ महिन्यांपासून व्यवस्थापन व कामगारांमध्ये पगारवाढी संदर्भात करार प्रलंबित होता. अखेर कामगार संघटना आणि व्यवस्थापन यांच्यात एकमत झाले. कामगारांना ७ हजार ५०० रुपये एवढी भरघोस पगारवाढ व या व्यतिरिक्त दर सहा महिन्यांनी मिळणारा खास भत्ता (special allowance) देखील कामगारांना देण्यात येणार आहे. अशा स्वरूपात कंपनीकडून पगारवाढ मान्य करून घेण्यात आली. तसेच २१ जुन्या कामगारांना नोकरी वरून कमी करण्यात आले होते. त्यांना सुद्धा कामावर पुन्हा घेण्यात आले.
या पगारवाढीबद्दल राईट टाईट फास्टनर माळेगांव युनियनच्या सर्व कामगारांनी व कामगार कमिटी सदस्यांनी मनसे कामगार सेनेचे आभार मानले आहेत. याप्रसंगी राईट टाईट फास्टनर कंपनीतील मनसे कामगार सेनेचे बिपीन निंबाळकर, आकाश बुचडे, शेखर कडभाने, योगेश म्हस्के, सचिन उगले, कमलेश घेगडमल आदी युनिट सदस्य व पदाधिकारी उपस्थित होते.
