इंडिया दर्पण ऑनलाईन डेस्क
आंतरराष्ट्रीय क्रिकेट मधील पदार्पणाच्या मालिकेत झंझावाती शतक झळकावलेल्या नाशिक जिल्हा क्रिकेट असोसिएशनचा युवा खेळाडू ,आक्रमक डावखुरा सलामीवीर साहिल पारख याची, १९ वर्षांखालील वयोगटातील महाराष्ट्र संघाच्या चेन्नई दौऱ्यासाठी कर्णधारपदी निवड झाली आहे. त्यासह नाशिकचा अष्टपैलू डावखुरा समकित सुराणा याचा देखील संघात समावेश करण्यात आला आहे.
बीसीसीआयच्या येत्या नविन सुरु होणाऱ्या २०२५-२६ क्रिकेट हंगामा साठी महाराष्ट्र क्रिकेट असोसिएशनने तयारी सुरु केली आहे. या अनुषंगाने महाराष्ट्राच्या १९ वर्षांखालील संघाच्या सराव सामन्यांसाठी महाराष्ट्र संघ चेन्नई येथे जाणार आहे. या सराव क्रिकेट दौऱ्यासाठी महाराष्ट्र संघाच्या कर्णधारपदी साहिल पारख याची निवड करणात आली आहे. १८ खेळाडूंचा १९ वर्षांखालील महाराष्ट्र संघ चेन्नई येथे चार दिवसीय सामने खेळणार आहे.
नाशिकचा खेळाडू भारतीय संघात असावा हे सर्व नाशिककरांचे स्वप्न साहिल पारख साकार करत सप्टेंबर २०२४ मध्ये ऑस्ट्रेलिया विरुद्धच्या एकदिवसीय मालिकेत आक्रमक डावखुरा सलामीवीर साहिल पारखने १९ वर्षांखालील भारतीय संघाचे प्रतिनिधित्व करतांना, आपल्या लौकिकास साजेशी फलंदाजी करत, केवळ ७५ चेंडूत नाबाद १०९ धावा फटकावत, भारतीय संघाला केवळ २२ षटकांतच ९ गडी राखून जोरदार विजय मिळवून दिला होता. त्यानंतर मागील २०२४-२५ च्या हंगामात साहिल पारख याची बीसीसीआयच्या विनू मंकड स्पर्धे साठी, १९ वर्षांखालील वयोगटातील महाराष्ट्र संघाच्या उपकर्णधारपदी निवड झाली होती .साहिल पारख ६ मे ते १६ मे दरम्यान झालेल्या भारतीय क्रिकेट नियामक मंडळ – बीसीसीआय – तर्फे आयोजित नॅशनल क्रिकेट अकादमी – एन सी ए – च्या बेंगळुरू येथे झालेल्या इंटर सेंटर ऑफ एक्सलन्स स्पर्धेत निवडला गेला होता.
भारतभरातील उदयोन्मुख युवा खेळाडूंसाठी बीसीसीआयच्या एनसीए, बेंगळुरू तर्फे आयोजित राष्ट्रीय पातळीवरील शिबीरात साहिलची गेल्या सलग ३-४ वर्षांपासून निवड होत आहे. वेळोवेळी झालेल्या राष्ट्रीय व राज्यस्तरीय स्पर्धेत केलेल्या लक्षणीय कामगिरीच्या जोरावरच १९ वर्षांखालील महाराष्ट्राच्या संघाच्या कर्णधारपदी निवड झाली आहे. नाशिकचा डावखुरा समकित सुराणा हा उदयोन्मुख अष्टपैलू खेळाडू असून नुकत्याच संपलेल्या हंगामात १९ वर्षांखालील नाशिक जिल्हा क्रिकेट संघाचे कर्णधार पद भूषवताना राज्यस्तरीय आमंत्रितांच्या क्रिकेट ( एम सी ए इन्विटेशन लीग ) स्पर्धेत फलंदाजी व डावखुरी फिरकी गोलंदाजीत जोरदार कामगिरी केली होती. वेळोवेळी झालेल्या राष्ट्रीय व राज्यस्तरीय स्पर्धेत केलेल्या लक्षणीय कामगिरीच्या जोरावरच या दोन नाशिककर खेळाडूंची १९ वर्षांखालील महाराष्ट्राच्या संघाच्या चेन्नई दौऱ्यासाठी निवड झाली आहे.
साहिल व समकितच्या या निवडीबद्दल नाशिक जिल्हा क्रिकेट संघटनेचे चेअरमन विनोद शहा, सेक्रेटरी समीर रकटे यांनी दोघांचे अभिनंदन करून स्पर्धेतील यशस्वी कामगिरीसाठी शुभेच्छा दिल्या आहेत.
