मुंबई (इंडिया दर्पण वृत्तसेवा) – गेल्या काही वर्षात राज्याच्या राजकारणांचा दर्जा घसरला आहे. सर्वच राजकीय पक्ष एकमेकांवर करत असलेल्या आरोपांमुळे नागरिकही वैतागले आहे. अशात विरोधात असलेल्या पक्षांचे कौतुक करणे ही गोष्ट दुर्मिळच. पण, मनसेच्या एका उमेदवारांला तिकीट मिळाल्यानंतर विरोधी पक्षात असलेल्या एका आमदाराने अभिनंदन केले आहे.
हे अभिनंदन राष्ट्रवादी काँग्रेस पार्टीचे शरद पवार गटाचे आमदार रोहित पवार यांनी केले आहे. ते सुध्दा अमित ठाकरे यांचे. मनसेने त्यांना उमेदवारी जाहीर केल्यामुळे ही पोस्ट त्यांनी सोशल मीडियावर टाकली आहे. ठाकरे घराण्यातून थेट निवडणुकीच्या रिंगणात उतरणारे ते दुसरे उमेदवार आहे. पहिले आदित्य ठाकरे यांनी थेट उडी घेतली. त्यानंतर आता माहिम मतदार संघातून अमित ठाकरे हे रिंगणात असणार आहे.
आ. रोहित पवार यांनी पोस्टमध्ये म्हटले आहे, माझे मित्र अमित जी ठाकरे यांना मनसेकडून उमेदवारी जाहीर झाल्याबद्दल त्यांचं मनःपूर्वक अभिनंदन! #महाराष्ट्र_धर्म रक्षणासाठी महत्वाच्या असलेल्या या लोकशाहीच्या लढाईत लढण्यासाठी आपल्याला शुभेच्छा!
