इंडिया दर्पण ऑनलाईन डेस्क
मराठी अस्मितेला नख लावू पाहणाऱ्या महाराष्ट्रद्रोही शक्तीच्या विरोधात ठाकरे कुटुंब एकत्र येत असेल तर मराठी मनासाठी हा सुवर्णक्षण असेल. केवळ ठाकरे कुटुंबानेच नाही तर सर्वच कुटुंबांनी महाराष्ट्रधर्म जपण्यासाठी एकत्र यायला हवं आणि यातच महाराष्ट्राचं हीत असल्याची पोस्ट राष्ट्रवादी शरद पवार गटाचे आमदार रोहित पवार यांनी सोशल मीडियावर शेअर केली आहे.
या पोस्टनंतर त्यावर प्रतिक्रिया येवू लागल्या आहे. काल मनसे अध्यक्ष राज ठाकरे यांची ज्येष्ठ सिने दिग्दर्शक महेश मांजरेकर यांनी मुलाखत घेतलेली मुलाखत प्रसारीत झाली. या मुलाखतीमध्ये राज ठाकरे यांनी शिवसेना ठाकरे गटाबरोबरच्या युतीबद्दल मोठे विधान केले. त्यात आमच्यातील वाद, आमच्यातील भांडण, आमच्यातील गोष्टी किरकोळ आहेत. त्यापेक्षा महाराष्ट्र खूप मोठा आहे. या महाराष्ट्राच्या आणि मराठी माणसाच्या अस्तित्वासाठी ही भांडणं हे वाद या गोष्टी शुल्लक आहेत असे राज ठाकरे यांनी सांगत उध्दव ठाकरेंना युतीचे संकेत दिले.
त्यानंतर आता उध्दव ठाकरे यांची सकारात्मक प्रतिक्रिया समोर आली आहे. ते म्हणाले की, मी किरकोळ भांडणं बाजूला ठेवालयला तयार आहे. सर्व मराठी माणसांच्या हितासाठी मी एकत्र यायला तयार आहे. त्यांनी अप्रत्यक्ष तयारी दाखवल्यानंतर एक अटही समोर ठेवली. माझ्याकडून कुणाशी भांडण नव्हतंच, पण, एकत्र येण्यासाठी महाराष्ट्राचं हित ही एकच शर्त आहे. चोरांच्या गाठीभेटी घ्यायच्या नाही. त्यांचा प्रचार करायचा नाही. अगोदर ही शपथ घ्यावी असेही ते म्हणाले.
या ठाकरे बंधुच्या प्रतिक्रियेनंतर खासदार संजय राऊत यांची प्रतिक्रिया समोर आली आहे. तिथेही ठाकरे आहेत. इथेही ठाकरे आहेत. दोघे भाऊ आहेत. हे नातं कायम आहे. काही राजकीय मतभेद झाले. त्यातून मार्ग वेगळे झाले असले तरी उध्दव ठाकरे यांचा मार्ग कायम महाराष्ट्र हिताचा राहिला आहे. राज ठाकरे यांचे विधान मी पण एेकलं. उध्दव ठाकरे यांनाही एेकलं त्यांनी भूमिका मांडली. या भूमिकेचं स्वागत आहेत. आम्ही सकारत्मक भूमिकेतून याकडे बघतोय असे राऊत म्हणाले. आम्ही वेट अँण्ड वॅाचच्या भूमिकेत आहोत. राज ठाकरेंची भूमिका नाकारण्याचा करंटेपणा आमच्याकडून होणार नाही असेही राऊत म्हणाले.
या सर्व प्रतिक्रियावर आमदार रोहित पवार यांची बोलकी प्रतिक्रिया समोर आली. त्यामुळे ती चर्चेची ठरली.
