मुंबई (इंडिया दर्पण वृत्तसेवा) – शिवसेना पक्षप्रमुख उद्धव ठाकरे यांनी प्रदीर्घ संघर्षानंतर मुख्यमंत्रीपदाचा राजीनामा अखेर दिला. एवढेच नाही तर भावनिक कार्ड खेळत त्यांनी विधान परिषदेचे सदस्यत्वही सोडले आहे. यापेक्षा एक पाऊल पुढे जात उद्धव ठाकरे यांनी एकप्रकारे भविष्यासाठीही आपले मनोगत व्यक्त केले आहे. नजिकच्या आणि यापुढील काळात उद्धव हे बाळासाहेब यांचीच रणनिती वापरणार असल्याचे जाणकारांचे म्हणणे आहे.
उद्धव त्यांच्या भाषणात म्हणाले की, मला त्या मार्गावर जायचे नव्हते पण मला जावे लागले. एकनाथ शिंदे यांना टोला लगावत म्हणाले की, तुम्हाला सत्तेचे पेढ लखलाभ असो मला फक्त तुमचे प्रेम हवे आहे. मी नंबर गेममध्ये जात नाही. त्यांच्याकडे बहुमत असेल, पण ते कसे जमवले गेले, हे पाहावे लागेल, असे त्यांनी स्पष्ट केले.
येत्या काळात उद्धव पुन्हा एकदा वडील बाळासाहेब ठाकरे यांच्या मार्गावर जाणार असल्याचे स्पष्ट झाले आहे. खरे तर २०१९ मध्ये महाविकास आघाडीचे मुख्यमंत्री म्हणून उद्धव ठाकरे यांनी शपथ घेतली तेव्हा ते मातोश्रीच्या परंपरेपेक्षा वेगळे होते. त्याआधी तब्बल ५ दशके बाळासाहेब ठाकरे महाराष्ट्राच्या राजकारणाचे प्रमुख होते, पण मुख्यमंत्री, केंद्रीय मंत्री किंवा सभागृहाचे सदस्य होण्यापासून ते दूर राहिले. ते सरकारांना आशीर्वाद देण्याच्या भूमिकेत राहिले आणि कोणत्याही सरकारच्या अपयशाची वा यशाची चटक त्यांच्यापर्यंत पोहोचली नाही.
कदाचित यामुळेच ठाकरे घराणे नेहमीच शिवसैनिकांच्या श्रद्धेचे केंद्र राहिले असून त्यांना कधीही वैयक्तिक टीका सहन करावी लागली नाही. शिवसेनेचे राजकारण समजून घेणार्‍यांचा असा विश्वास आहे की, उद्धव ठाकरे यांनी स्वतः मुख्यमंत्रीपद स्वीकारले आणि पुत्र आदित्य ठाकरे यांना मंत्रिमंडळाचा भाग बनवून बाळासाहेबांच्या काळातील नैतिक दरारा कमकुवत केला. अशा परिस्थितीत ज्याची भीती वाटायची तेच व्हायला हवे होते. सरकारच्या सर्वच निर्णयांवर उद्धव थेट निशाण्यावर आले आणि सततच्या या निर्णयामुळे प्रतिमाही डागाळली. शेवटी एकनाथ शिंदे गटाने अशी बंडखोरी केली की, पक्षाची सत्ताच निघून गेली.
अशा स्थितीत मला त्या वाटेने जायचे नव्हते आणि माझी शिवसेना आहे, हा उद्धव ठाकरेंचा संदेश त्यांच्या मनोवृत्तीचे द्योतक आहे. उद्धव ठाकरे आता पुन्हा पक्ष केडर मजबूत करतील आणि वडिलांची शिकवण पाळून सत्तेपासून दूर राहून राजकारण करतील, असेच जाणकारांचे म्हणणे आहे. शिवाय लवकरच होणाऱ्या मुंबईसह अन्य महापालिका निवडणुकांमध्ये ते आपली ताकद दाखवून देतील, असेही अनेकांनी म्हटले आहे.
After Resignation Uddhav Thackeray will go with Balasaheb Strategy Shivsena
