सर्वांत सुरक्षित बँक कोणती? रिझर्व्ह बँकेने जाहीर केली यादी; बघा, यात तुमची बँक आहे का?

नितीन नायगावकर, इंडिया दर्पण वृत्तसेवा
अडचणीच्या वेळी निकड भागावी यासाठी पै-पै जोडली जाते. सुरक्षिततेच्या दृष्टीने हा पैसा बँकेत ठेवला जातो. पण, बँका बुडीत खात्यात गेल्या, दिवाळखोरी घोषीत केली तर संकट ओढवले जाण्याची शक्यता नाकारता येत नाही. याच कल्पनेतून ग्राहकही धास्तीत असतात. पण, आता धास्तीचे कारण नाही. रिझर्व्ह बँकेने नुकतीच देशातील सर्वाधिक सुरक्षित बँकांची यादी जाहीर केली. या बँकांमध्ये आपला पैसा एकदम सुरक्षित आहे.

दरवर्षीच रिझर्व्ह बँक देशातील सर्वात सुरक्षित बँकांची यादी जाहीर करते. या यादीतील बँकांना डोमेस्टिक सिस्टमॅटिकली इंपोर्टेंट बँके संबोधले जाते. सुरक्षित बँकांच्या यादीत एचडीएफसी, आयसीआयसीआय आणि एसबीआय यांचा समावेश आहे. बँका अडचणीत आल्यास सर्वसामान्यांनी घाम गाळून गोळा केलेला पैसासुद्धा बुडू शकतो. हे टाळण्यासाठीच केंद्र सरकार आणि आरबीआय विशेष योजना राबविते. या बँकांना कोणत्याही प्रकारची समस्या असल्यास तर केंद्र सरकार त्यांना वाचविण्यासाठी विशेष भर देते. त्यातून डीएसबीआयची सुरुवात झाली. त्यासाठी निकष ठरविण्यात आले आहेत.

2008 साली जागतिक मंदी आली. अर्थात भारताला या मंदीची फार झळ बसली नाही. पण जगातील अनेक मोठ्या बँका या मंदीत धराशायी झाल्या. त्यावेळी केंद्र सरकार आणि आरबीआयने अशा काही बँकांची निवड करण्याची गरज वाटली. या बँका मंदीच्या काळात अर्थव्यवस्थेला ताबडतोब मदत करतील, यासाठी त्यांना सर्व सुविधा देण्याची योजना आखण्यात आली आणि त्यानुसार दरवर्षी सुरक्षित बँकांची यादी जाहीर केली जाते.

पहिली यादी 2015 मध्ये
2014 साली आरबीआयने बँकांच्या निवडीसाठी फ्रेमवर्क तयार केली. 2015 मध्ये डीएसआयबीने पहिली यादी तयार केली. या पहिल्या यादीत एसबीआय आणि आयसीआयसीआयने स्थान पटकावले होते. त्यानंतर या यादीत आणखी एका बँकेची भर पडली. एचडीएफसी बँकेने या यादीत प्रवेश केला. पहिल्या क्रमांकावर आयसीआयसीआय बँक आणि एचडीएफसी बँक आहे. त्यानंतर एसबीआयचा क्रमांक लागतो. या बँकांना काही नियमही लागू असतात. या नियमांचे त्यांना पालन करावे लागले. देशाच्या राष्ट्रीय सकल उत्पन्नाच्या 2 टक्क्यांहून ज्या बँकांची एकूण संपत्ती असते, त्यांचा समावेश डीएसआयबी बँकांच्या यादीत करण्यात येतो. काही खास मुद्यांच्या आधारे या बँकांना पाच विविध श्रेणीत समाविष्ट करण्यात येते. चढत्या क्रमाने ही यादी तयार करण्यात येते.

Reserve Bank Of India Release Safest Bank See Details